ხარაგაულის საინფორმაციო საკონსულტაციო სამსახურის წარმომადგენელმა, ნათია ბერაძემ ხარაგაულის მუნიციპალიტეტის ადმინისტრაციულ შენობაში დაბის მოსახლეობასთან შეხვედრა გამართა. ნათია ბერაძემ მოსახლეობას სახელმწიფო პროექტში - „დანერგე მომავალი“ შესული ცვლილებები გააცნო. პროექტს ახალი ქვეკომპონენტი – „კენკროვანი კულტურები“ დაემატა, რომელიც რამდენიმე მუნიციპალიტეტში, მათ შორის ხარაგაულშიც, 100%-ით დაფინანსდება. შესაძენი მოცვის, მაყვლის და ჟოლოს ნერგების ღირებულება 100%-ით დაფინანსდება, როგორც ადგილობრივ ბაზარზე შეძენისას, ასევე მათი იმპორტის შემთხვევაში. 100%-ით დაფინანსდება წვეთოვანი სარწყავი სისტემების ღირებულებაც. საჭიროების შემთხვევაში კი  ბაღის გაშენებისთვის საჭირო მასალებიც. ფიზიკური პირის შემთხვევაში, ერთ ბენეფიციარზე დასაშვებია არანაკლებ 0.15 ჰა და არაუმეტეს 0.5 ჰა კენკროვანი კულტურის ბაღის გაშენების დაფინანსება. სასოფლო-სამეურნეო კოოპერატივის მიერ კენკროვანი კულტურის ბაღის გაშენების ფართობი განისაზღვრება თითოეული მეპაიის მიერ შეტანილი სასოფლო-სამეურნეო დანიშნულების მიწის ნაკვეთის რაოდენობის მიხედვით, თითოეულ მეპაიეზე არაუმეტეს 0,5 ჰა-ის გადაანგარიშებით.  სასოფლო-სამეურნეო სტატუსის მქონე კოოპერატივს, რომელიც დაფინანსებას მიიღებს არანაკლებ 5 ჰექტარზე ბაღის გასაშენებლად, უსასყიდლოდ გადაეცემა პირველადი დასაწყობებისთვის საჭირო 1 ერთეული  მაცივარკონტეინერი (საშუალოდ 20 ტონიანი ტევადობით). ტერიტორიაზე სადაც ბენეფიციარი გეგმავს ბაღის გაშენებას აუცილებელია არაუმეტეს 500 მეტრში იყოს წყლის სათავე ნაგებობა და ელექტროენერგიის წყარო არაუმეტეს 800 მეტრში. ტერიტორიაზე არ უნდა იყოს შენობა-ნაგებობები და ნარგავები. გათვალისწინებულია შესაბამისი ტრენინგების ჩატარება ბენეფიციარებისთვის, რომლებიც სრულად წარადგენენ სააგენტოში პირველ ეტაპზე წარსადგენ დოკუმენტაციას. ტრენინგების დასრულების შემდგომ ტარდება ტრენინგგავლილი პირების ტესტირება შესწავლილ საკითხებში. ბენეფიციარის გამარჯვების შემთხვევაში სპეციალისტების მიერ  შემოწმდება მიწის ვარგისიანობა კენკროვანი მცენარეებისთვის. დაინტერესების შემთხვევაში მიმართეთ: სოფლის მეურნეობის სამინისტროს ხარაგაულის საინფორმაციო საკონსულტაციო სამსახურს. ნათია ბერაძე ტელ: 599 85 26 01 ასევე, მერის წარმომადგენელს თქვენ ადმინისტრაციულ ერთეულში.    

საგანმანათლებლო პროექტ „ეტალონში“ გამარჯვებული მოსწავლეები ხარაგაულის მერმა, ნიკოლოზ თოფურიძემ, პორტატული კომპიუტერებით დაასაჩუქრა.  2017-2018 სასწავლო წელს, ხარაგაულში გამართული „ეტალონის“ გამარჯვებული მოსწავლეები არიან - ლიზა ბარბაქაძე (N2 საჯარო სკოლა - I ადგილი), ნინო მაღრაძე (ვახანის საჯარო სკოლა - II ადგილი) და მარიამ კოჩაძე (მარელისის საჯარო სკოლა - III ადგილი). ნიკოლოზ თოფურიძე, მოსწავლეებს და მათ მშობლებს საგანმანათლებლო რესურსცენტრის უფროს, მარინა ვეფხვაძესთან ერთად შეხვდა და წარმატებები უსურვა.      

ხარაგაულის წმიდა ანდრია პირველწოდებულის სახელობის გიმნაზიაში, დღეს, ახალი სასწავლო წელი განახლებულ შენობაში დაიწყო.  „ისწავლეთ და იყავით თავისუფლები, ოღონდ თავისუფლები არა სინდისისგან, არამედ შემოქმედებით თავისუფლები, იკითხეთ ბევრი და წიგნი იყოს თქვენი მეგობარი. ღმერთმა დალოცვილები, დღეგრძელები გამყოფოთ“ - ამ სიტყვებით მიმართა და სწავლის დაწყება მიულოცა მოსწავლეებს მეუფე მელქისედეკმა (ხაჩიძე).  მეუფემ მადლობა გადაუხადა მამა ანტონს (სულთანიშვილი), ხარაგაულის მუნიციპალიტეტის მერს, ნიკოლოზ თოფურიძეს, ირაკლი ებანოიძეს, დავით ლაცაბიძეს და ყველა იმ ადამიანს, რომელიც ჩართული იყო სკოლის რეაბილიტაციის პროცესში. მუნიციპალიტეტის მერმა, ნიკოლოზ თოფურიძემ ახალი სასწავლო წელი მიულოცა გიმნაზიის საგანმანათლებლო სივრცის წარმომადგენლებს და წარმატებები უსურვა.

ხარაგაული უერთდება საქართველოში მიმდინარე ევროპის კვირეულს სპორტში. მთელი კვირის განმავლობაში სპორტულ დარბაზში ჩემპიონატები სამაგიდო თამაშებში ჩატარდება . კვირეულის ფარგლებში, 24 სექტემბერს, ჩატარდა მუნიციპალიტეტის პირველობა ჭადრაკში. ტურნირის გამარჯვებული და პირველი ადგილის მფლობელი ნიკოლოზ ბუაჩიძე გახდა. მეორე ადგილი სოსო მელქაძემ დაიკავა, ხოლო მესამე ადგილი წილად ხვდა გია თავზარაშვილს.  ევროპის სპორტული დღეები ხარაგაულში მთელი კვირის განმავლობაში გაგრძელდება; 26 სექტემბერს, 11:00 საათზე ხარაგაულის სპორტულ დარბაზში ტურნირი გაიმართება ნარდში, 27 სექტემბერს 11:00 საათზე - დომინოში, ხოლო 28 სექტემბერს ასევე, 11 საათიდან მაგიდის ჩოგბურთის ჩემპიონატი დაიწყება.  სამაგიდო თამაშებში ნებისმიერ მსურველს შეუძლია მონაწილეობის მიღება.   ხარაგაულში ევროპის კვირეულის მხარდამჭერია მერიის კულტურის, განათლების, სპორტის და ახალგაზრდობის საქმეთა სამსახური(უფროსი ირინე ჩხეიძე) და სპორტისა და შიდა ტურიზმის ცენტრი (დირექტორი, გრიგოლ ჭიპაშვილი).  

ხარაგაულის სოფელ სარგვეშში სკოლამდელი მზაობის ცენტრი გაიხსნა. ჯგუფში სკოლამდელი მზაობის მომსახურებას 15 ბავშვი მიიღებს. სარგვეშის საჯარო სკოლის ბაზაზე სკოლამდელი მზაობის ჯგუფის გახსნა სარგვეშის ადმინისტრაციული ერთეულის მაჟორიტარი დეპუტატის, რუსუდან გიორგაძის ძალისხმევით განხორციელდა. მზაობის ჯგუფში აღსაზრდელები კვების და მოსვენების მომსახურებასაც მიიღებენ. ხარაგაულის მუნიციპალიტეტის მერმა, ნიკოლოზ თოფურიძემ აღსაზრდელებს, მშობლებსა და პედაგოგებს სკოლამდელი მზაობის ჯგუფის გახსნა მიულოცა: „მინდა მადლობა გადავუხადო ქალბატონ, რუსუდანს ასეთი კარგი საქმის გაკეთებისთვის. სკოლამდელი მზაობის ჯგუფის გახსნა ხელს შეუწყობს აქ ახალგაზრდა ოჯახების დამაგრებას და  სოფლის გაძლიერებას. ვულოცავ სოფლის მოსახლეობას ამ დღეს და წარმატებებს ვუსურვებ.“ მზაობის ჯგუფში მისულ აღსაზრდელებს რუსუდან გიორგაძის ფინანსური დახმარებით მათთვის განკუთვნილი საჩუქრები დახვდათ. ეზოში განთავსდა სათამოშო ინვენტარი. სარგვეშში სკოლამდელი მზაობის ჯგუფის გახსნას მერიის კულტურის სამსახურის, სკოლამდელ დაწესებულებათა გაერთიანებისა და საგანმანათლებლო რესურსცენტრის წარმომადგენლები ესწრებოდნენ.  

ხარაგაულის მუნიციპალიტეტის მერმა, ნიკოლოზ თოფურიძემ „სკოლამდელ დაწესებულებათა გაერთიანების“ დირექტორთან, მამუკა ჭიპაშვილთან და ადმინისტრაციული ერთეულის წარმომადგენლებთან ერთად, ვერტყვიჭალის საბავშვო ბაღის აღსაზრდელები მოინახულა და სასწავლო წლის დაწყება მიულოცა.  „ძალიან სასიამოვნოა, რომ ამ ეტაპზე ვერტყვიჭალაში 45 სკოლამდელი ასაკის ბავშვია და მზარდი კონტიგენტია. მომავალი წლიდან,  მათთვის ახალი საბავშვო ბაღი აშენდება და ინვენტარიც განახლდება. ჩვენთვის ბავშვებისთვის სასწავლო პირობების გაუმჯობესება პრიორიტეტია“-  განაცხადა ნიკოლოზ თოფურიძემ. ვერტყვიჭალის ბაღის მშენებლობას რეგიონული განვითარების ფონდი 417 000 ლარით აფინანსებს. ადგილობრივი ბიუჯეტის თანამონაწილეობა კი თანხის 5%-ს შეადგენს.    

ხარაგაულის მუნიციპალიტეის მერი ნიკოლოზ თოფურიძე  და მერის პირველი მოადგილე, არჩილ მაღრაძე სოფელ ლახუნდარისა და წყალაფორეთის ადგილობრივ მოსახლეობას შეხვდნენ. მუნიციპალიტეტის პირველ პირებს ადგილობრივი მოსახლეობა მათ წინაშე არსებულ პრობლემებსა და საჭიროებებზე ღიად ესაუბრა. ძირითადი საკითხები საგზაო ინფრასტრუქტურის რეაბილიტაციას შეეხო. ადგილობრივების წინაშე ასევე მწვავედ დგას ხე-ტყის მოპოვებისა და სოციალური საკითხები. პრიორიტეტად სოფლებში გზების რეაბილიტაცია და წყლის სისტემის მოწყობა დასახელდა.   მუნიციპალიტეტის მერი, ნიკოლოზ თოფურიძე ადგილობრივებს გაწეული მუშაობის შესახებ ესაუბრა და მათ მერიის სამოქმედო გეგმა გააცნო. მერმა აღნიშნა, რომ მუნიციპალიტეტის მასშტაბით უპრეცედენტო რაოდენობის ინფრასტრუქტურული პროექტები ხორციელდება. მისივე განმარტებით 2017-2018 წლებში წყალაფორეთის ადმინისტარციულ ერთეულში საგზაო ინფრტასტრუქტურის მოწესრიგებისთვის მილონ 174 ათასი ლარი გამოიყო. შეხვედრაზე ადგილობრივმა მოსახლეობამ ხონის გზაზე სამშენებლო სამუშაოების დროულად დაწყება მოითხოვა, მათი განმარტებით გზის რეაბილიტაციის მიზნით გამოიყო თანხა, თუმცა ტენდერში გამარჯვებული კომპანია სამუშაოებს  აგვიანებს. მერის პირველი მოადგილის, არჩილ მაღრაძის  განცხადებით მშენებელმა კომპანიამ სამუშაოები 5 იანვრამდე უნდა დაასრულოს, თუ კომპანია აღნიშნულ პროექტს ხელშეკრულებით განსაზღვრულ ვადაში ვერ შეასრულებს დაჯარიმდება ან  შეუწყდება ხელშეკრულება.  მოსახლეობასთან შეხვედრისას ნიკოლოზ თოფურიძემ   აზიური ფაროსანას მიერ მიყენებულ ზარალსა და მის წინააღმდეგ დაგეგმილ ღონისძიებებზე ისაუბრა.

kharagaulinews.gov.ge გაცნობებთ, რომ განხორციელდა ხარაგაულის მუნიციპალიტეტის ვებ გვერდის რებრედინგი და იგი განახლებული დიზაინითა და ახალი მისამართით ( kharagaulinews.gov.ge ) შევიდა ექსპლუატაციაში. ვებ გვერდის ახალი ვერსია გაცილებით უფრო მოქნილი და ეფექტურია. საიტი არის ე.წ. რესპონსივი, რაც ნიშნავს, რომ ინტერნეტის ტელეფონით მომხმარებლებისთვის იგი უფრო ხელსაყრელი და ადვილადმოხმარებადია.  ვებ გვერდის ახალ ვერსიაში ინფორმაციები უფრო მოკლედ, კონკრეტულად და მკაფიოდაა წარმოდგენილი. განახლებულ ვებ გვერდზე დატანილია ინფორმაცია ხარაგაულის მუნიციპალიტეტის მერიის, საკრებულოს, ა(ა)იპ -ებისა და სხვადასხვა ორგანიზაციების შესახებ. ვებ გვერდს ზედა მარჯვენა კუთხეში არის ჩანართი წარწერით - საიტის ძველი ვერსია, რომელიც ამჟამად განახლების პროცესშია, სადაც ვრცლად არის წარმოდგენილი ინფორმაცია ხარაგაულის შესახებ. 

შვედი ექიმები მუნიციპალიტეტში ორი კვირის განმავლობაში დარჩებიან და პრევენციის მიზნით, სკოლამდელი და სასკოლო ასაკის ბავშვებს გამოიკვლევენ.  ასოციაციის (ხელმძღვანელი Kale spens) წარმომადგენლები და საზოგადოებრივი ჯანდაცვის ცენტრის დირექტორი, შმაგი ხიჯაკაძე, დღეს, ხარაგაულის მუნიციპალიტეტის მერს, ნიკოლოზ თოფურიძეს შეხვდნენ და გამოკვლევების ჩასატარებლად კონკრეტული დეტალები განიხილეს. სტოქჰოლმის სმენადაქვეითებულთა ასოციაციის ექიმები ხარაგაულში გამოკვლევებს ხვალიდან დაიწყებენ. მანამდე კი, 20-21 სექტემბერს, ხარაგაულის ინოვაციების ცენტრში, მუნიციპალიტეტის მასშტაბით, საჯარო სკოლების ექიმებს, ექთნებს, ასევე, უბნის ექიმებს სმენასთან დაკავშირებული პრობლემების შესახებ სემინარს ჩაუტარებენ. მნიშვნელოვანია, რომ ექიმები, თავისუფალ დროს, ჯანდაცვის ცენტრის შენობაში სხვა ბენეფიციარებსაც გამოიკვლევენ.  შვედი ექიმების ჯგუფი ხარაგაულში წელს მეორედ იმყოფება. გასულ წელს ასოციაციის წარმომადგენლებმა ხარაგაულში 850 ადამიანი გამოიკვლიეს და მათ შორის 70 ბენეფიციარს 100 000 ლარის ღირებულების სმენის აპარატები უსასყიდლოდ გადასცეს.  სტოქჰოლმის სმენადაქვეითებულთა ასოციაციის ვიზიტის ინიციატორი ხარაგაულში პროგრამის კოორდინატორი მაია ბერაძე-ჯონსონი გახლავთ.  ვიზიტის მხარდამჭერია ხარაგულის მერია და საზოგადოებრივი ჯანდაცვის ცენტრი.

დღეს ხარაგაულის მუნიციპალიტეტის საკრებულოს ბიუროს სხდომა გაიმართა. სხდომაზე დეპუტატებმა, დღის წესრიგით გათვალისწინებული, 10 საკითხი განიხილეს. ბიუროს წევრებს მერიის ეკონომიკისა და ქონების მართვის სამსახურის ანგარიში (2017 წ. 2018 წლის აგვისტომდე) გაწეული მუშაობის შესახებ ამავე სამსახურის უფროსმა, ჯაბა ბერაძემ წარუდგინა. იხილეთ დანართი მერიის ადმინისტრაციული სამსახურის უფროსმა, კახა გოლუბიანმა დეპუტატებს ,,ხარაგაულის მუნიციპალიტეტის მერიის საშტატო ნუსხისა და თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრის შესახებ“ ინფორმაცია გააცნო. ცვლილების თანახმად, სამხედრო აღრიცხვისა და გაწვევის სამსახურიდან უმცროსი სპეციალისტის შტატი გადაინაცვლებს კოორდინაციის განყოფილების კიცხის ადმინისტრაციული ერთეულში. ბიუროს წევრებმა, ასევე, განიხილეს შემდეგი საკითხები: 1. ხარაგაულის მუნიციპალიტეტის საკრებულოს აპარატის მიერ 2017 წლის 20 ნოემბრიდან 2018 წლის 17 სექტემბრამდე გაწეული მუშაობის შესახებ (მომხს: ლენა კალანდაძე); იხილეთ დანართი 2. ხარაგაულის მუნიციპალიტეტის საკრებულოს 2017 წლის 3 ივლისის #50/43 განკარგეულბაში „საპრივატიზაციო ობიექტების ნუსხის დამტკიცების შესახებ“ ცვლილების შეტანის თაობაზე (მომხს: ჯაბა ბერაძე); 3. ხარაგაულის მუნიციპალიტეტის საკრებულოს 2017 წლის 3 ივლისის #50/44 განკარგეულბაში „„ხარაგაულის მუნიციპალიტეტის საკუთრებაში არსებული ქონების საპრივატიზაციო ობიექტთა გეგმის დამტკიცების შესახებ“ ცვლილების შეტანის თაობაზე (მომხს: ჯაბა ბერაძე); 4. ხარაგაულის მუნიციპალიტეტის საკრებულოს 2018 წლის 06 აგვისტოს N32 დადგენილებაში „ხარაგაულის მუნიციპალიტეტის დაბა ხარაგაულის ტერიტორიაზე გარე ვაჭრობის რეგულირების წესების დადგენის შესახებ“ ცვლილების შეტანის თაობაზე (მომხს: ოთარ ლურსმანაშვილი); 5. ხარაგაულის მუნიციპალიტეტის საკრებულოს 2015 წლის 6 აპრილის N16 დადგენილებაში „ადგილობრივი მოსაკრებლების შემოღების შესახებ“ ცვლილების შეტანის თაობაზე (მომხს: ოთარ ლურსმანაშვილი); 6. ხარაგაულის მუნიციპალიტეტის საკრებულოს 2018 წლის 15 აგვისტოს N15 დადგენილებაში „ხარაგაულის მუნიციპალიტეტის ტერიტორიაზე I კლასს დაქვემდებარებულ შენობა-ნაგებობათა სახეობების განსაზღვრის შესახებ, რომელთა განთავსება/მშენებლობა შესაძლებელია მშენებლობის ნებართვით და მშენებლობის ნებართვის გარეშე“ ცვლილების შეტანის თაობაზე (მომხს: ოთარ ლურსმანაშვილი); 7. ადგილობრივი მნიშვნელობის საავტომობილო გზების ნუსხის დამტკიცების შესახებ (მომხს: ოთარ ლურსმანაშვილი) 8. ხარაგაულის მუნიციპალიტეტის საკრებულოს 2015 წლის 25 თებერვლის # 12 დადგენილებაში „ხარაგაულის მუნიციპალიტეტის ოფიციალური ვებ გვერდის დებულების დამტკიცების შესახებ“ ცვლილების შეტანის თაობაზე (მომხს: ოთარ ლურსმანაშვილი). დეპუტატები ზემოაღნიშნულ საკითხებს 1 ოქტომბრის საკრებულოს სხდომაზე უყრიან კენჭს. ბიუროს სხდომაზე იმყოფებოდა არასამთავრობო ორგანიზაციის - „ქალები მშვიდობისათვის“ ხელმძღვანელი, ხათუნა მანჯავიძე და ა(ა)იპ „დასუფთავებისა და კეთილმოწყობის გაერთიანების“ დირექტორი, თემურ ფურცელაძე. საუბარი შეეხო ა/ო „ქალები ქვეყნის მომავლისათვის“ მიერ გაკეთებულ პროექტს, რომელიც ხარაგაულში ნარჩენების სეპარირებას და მუნიციპალიტეტის ტერიტორიაზე პოლიეთილენის ბოთლებისთვის სპეციალური ურნების განთავსებას ითვალისწინებდა. ხათუნა მანჯავიძის განცხადებით: „ფინანსების ამოწურვის შემდეგ, პროექტი მოტივაციის გაზრდისთვის მუნიციპალიტეტს გადაეცა. ნარჩენების მართვა ხარაგაულის დასუფთავების სამსახურს უნდა განეხორციელებინა თუმცა, დღეს, პოლიეთილენის ბოთლების დაპრესვა აღარ ხდება, ხოლო, პრესი, რომელიც ასევე მუნიციპალიტეტს გადაეცა დაზიანებულია. რომელ ეკოლოგიაზეა საუბარი, როდესაც ამდენ პოლიეთილენის ბოთლს ვმარხავთ, მე ეს პროექტი ქვეყნის სიყვარულით გავაკეთე, ახლა კი ჩემთვის გაუგებარია, რატომ შეწყდა პროექტის დაფინანსება“ - აცხადებს ხათუნა მანჯავიძე. თემურ ფურცელაძის განმარტებით, დასუფთავების ა(ა)იპ-ის თანამშრომლები გარკვეული პერიოდი უსასყიდლოდ ეხმარებოდნენ არასამთავრობო ორგანიზაციას სამუშაოების განხორციელებაში. „ამ ეტაპზე, გარდა იმისა, რომ პრესი დაზიანებულია, ნარჩენების შესაგროვებლად არც სპეციალური ტექნიკა გვყავს და არც სახსრები გაგვაჩნია. ამ ყველაფერთან ერთად, პროექტი სამართავად მუნიციპალიტეტის ბალანსზე არ გადასულა, შესაბამისად, სამუშაოებსაც ვერ განვახორციელებთ“ -განაცხადა თემურ ფურცელაძემ და დასძინა, რომ თავად პროექტი ძალიან კარგია და მუნიციპალიტეტისთვის მნიშვნელოვანია.