„სოფლის მხარდაჭერის პროგრამა - 2020“ იწყება! 20 იანვარს, ხარაგაულის მუნიციპალიტეტის მერთან, სოფლის მხარდაჭერის პროგრამის ფარგლებში შექმნილი სამუშაო ჯგუფი და მერის წარმომადგენლები შეიკრიბნენ. 2020 წელს ხარაგაულმა სოფლის პროექტების დსაფინანსებლად 890 000 ლარი მიიღო. პროექტების შერჩევა მოსახლეობის მიერ ხდება და შერჩევის პროცესი 2020 წლის 1 მარტამდე უნდ დასრულდეს. დასაფინანსებელი პროექტები განსაზღვრულია და მათ შორისაა - ▪  სასმელი წყლის და სარწყავი სისტემების, სანიაღვრე არხების მოწესრიგება; ▪  ნაპირსამაგრი სამუშაოები; ▪  გზების და ხიდების მოწესრიგება; ▪  გარე განათების ქსელის მოწყობა; ▪  სკოლების მიმდებარე ტერიტორიის, კულტურის ობიექტების, სპორტული ინფრასტრუქტურის, მოედნებისა და სკვერების მოწყობა და სხვა. ნუსხიდან ამოღებულია სასაფლაოების შემოღობვა და სარიტუალო სახლების აშენება-რეაბილიტაცია. საქართველოს მასშტაბით, იმერეთის რეგიონს, გამოყოფილი თანხის 18% ხვდა წილად, ხოლო იმერეთის მუნინციპალიტეტებს შორის, აღნიშნული თანხიდან ყველაზე დიდი დაფინანსება 890 000 ლარი ხარაგაულმა მიიღო. 2020 წელს სოფლის პროექტების განსახორციელებლად სახელმწიფო ბიუჯეტიდან 40 მილიონი დაიხარჯება. შეხვედრის დროს მუნიციპალიტეტის წარმომადგენლებმა მიიღეს ინფორმაცია კრებების ჩატარებასთან დაკავშირებით, განემარტათ კრების გადაწყვეტილების სწორად გაფორმება და საკრებულოში წარდგენასთან დაკავშირებული პროცედურებისა და ვადების შესახებ ინფორმაცია. საერთო კრებების ჩატარება ხარაგაულის სოფლებში, სავარაუდოდ 1 თებერვლიდან დაიწყება.

ხარაგაულის მუნიციპალიტეტში ადგილობრივი მნიშვნელობის ღორეშა-ბაზალეთის დამაკავშირებელი გზის 11 კილომეტრიანი მონაკვეთის რეაბილიტაცია დაიწყო! საგზაო ინფრასტრუქტურის მშენებლობას საქართველოს მუნიციპალური განვითარების ფონდი ახორციელებს. ფონდის დირექტორი, გიორგი შენგელია, იმერეთის მხარის რწმუნებულის მოადგილე, ბესიკ გოფოძე და ხარაგაულის მერის მოადგილე, თემურ ჩხეიძე, ღორეშა-ბაზალეთის გზაზე მიმდინარე სამუშაოებს გაეცნენ. დაათვალიერეს გზის 11 კილომეტრიანი მონაკვეთი, ადგილზე შეხვდნენ მოსახლეობას და მათთან ერთად გაიარეს მშენებლობის პროცესში მოსალოდნელი რისკები. აღნიშნული გზით ხარაგაულის ცენტრი, ბაზალეთი-სარგვეში-ღორეშა-უბისის გავლით ცენტრალურ საავტომობილო მაგისტრალს დაუკავშირდება.  საერთო ჯამში, ხარაგაული-ბაზალეთი-ღორეშა-უბისას დამაკავშირებელი გზა 21 კილომეტრია, აქედან ხარაგაული-ბაზალეთის მიმართულებით 3,5 კილომეტრიანი მონაკვეთი მოასფალტებულია, ასევე რეაბილიტირებულია 6 კმ. გზა ღორეშა-უბისას მიმართულებით. ამჟამად სწორედ შუა მონაკვეთში მდებარე 11 კოლომეტრი გზის რეაბილიტაცია მიმდინარეობს. გაცნობებთ, რომ ზემოთ ხსენებული გზის რეაბილიტაცია ხარვეზიანი პროექტის გამო ორჯერ შეფერხდა. ხარაგაულის მუნიციპალიტეტის მერიის მიერ მომზადდა ახალი პროექტი. ტენდერი 2019 წლის ბოლოს გამოცხადდა, გამოვლინდა გამარჯვებული კომპანია, „კავკასუს როუდ პროჯექტი“, რომელიც საქართველოში ერთ-ერთ უდიდეს კომპანიას წარმოადგენს გზების მშენებლობის სფეროში.  კომპანია სამუშაოებს უკვე აქტიურ ფაზაში აწარმოებს. ამ ეტაპზე მიმდინარეობს გზაზე ქვიშა-ხრეშოვანი ღორღის შეტანა, საჭიროების ადგილებზე ეწყობა საყრდენი კედლები. პროექტის ფარგლებში მდინარე ყარნებაზე იგეგმება ახალი საავტომობილო ხიდის მშენებლობა. გზის სიგანე იქნება 5 მეტრი, საჭიროების ადგილებზე მოეწყობა ცხაურები და სანიაღვრე არხები. გზის მთელ სიგრძეზე იქნება საგზაო მონიშვნები.   პროექტის ღირებულება 9 მილიონი ლარია, სახელშეკრულებო პირობებით, გზის მშენებლობა 2020 წლის ბოლოს დაასრულდება.  

10 იანვარს, 12 საათზე, ხარაგაულის ბიბლიოთეკის სამკითხველო დარბაზში, დასაქმების მსურველთათვის, „აჭარა ჯგუფის“ რიგით მეორე შეხვედრა გაიმართება. „ბაკურიანი-რუმსში“, რომელიც „აჭარა ჯგუფის“ სასტუმროების ქსელია, ამ დროისთვის უკვე დასაქმებულია ხარაგაულელთა გარკვეული ნაწილი. „აჭარა ჯგუფის„ წარმომადგენლები დღევადელ შეხვედრაზე წარმოადგენენ დასაქმებულთა სტატისტიკას და დასაქმების პირობებს. ასევე, ინდვიდუალურად გაესაუბრებიან დაინტერესებულ საზოგადოებას. შეგახსენებთ, რომ ბაკურიანის „რუმსში“ მომუშავე პერსონალი უზრუნველყოფილი იქნება საცხოვრებელი ფართით და ორჯერადი კვებით! წარმატებებს გისურვებთ!

7 იანვარს ხარაგაულში ტრადიციული საშობაო ალილო ჩატარდა.  შობის მახარობლებმა ქუჩაში მსვლელობა მოაწყვეს და გალობით ამცნეს სამყაროს უფლის დაბადება. ხარაგაულის საკათედრო ტაძრის წინამძღვარმა, მამა თომა ლაცაბიძემ დაბის ქუჩები აკურთხა და მოსახლეობა დალოცა, რომლებიც გზა და გზა შემოწირულობებით უერთებოდნენ საშობაო მსვლელობას. საშობაო ალილო ხარაგაულში, მარგვეთისა და უბისის ეპისკოპოსის მელქისედეკ ხაჩიძის ლოცვა-კურთხევითა და ხარაგაულის მუნიციპალიტეტის მერიის ორგანიზებით მოეწყო, რომლის ფარგლებშიც საშობაო ნობათი დაურიგდა მუნიციპალიტეტში მცხოვრებ 200-ზე მეტ უკიდურესად გაჭირვებულ ოჯახს. ხარაგაულის მუნიციპალიტეტის მერია გილოცავთ ქრისტეშობის დღესასწაულს

ხარაგაულის მერიამ წინასაახალწლოდ სოციალური აქციის ფარგლებში სხვადასხვა სახის აქტივობა განახორციელა.  უკიდურესად გაჭირვებული და სოციალურად დაუცველი ოჯახების დასახმარებლად ადგილობრივი ბიუჯეტიდან 16 550 ლარი დაიხარჯა.  ხარაგაულის მუნიციპალიტეტის მერი, ნიკოლოზ თოფურიძე, მერიის სამსახურების უფროსებთან ერთად მუნიციპალიტეტში მცხოვრებ ყველაზე ახალგაზრდა მრავალშვილიან დედას, მარინა კვანჭიანს ესტუმრნენ. მამუკა ლორთქიფანიძის და 34 წლის მარინა კვანჭიანის ოჯახს შვიდი არასრუწლოვანი შვილი ყავთ. ადგილობრივი თვითმმართველობის თანამდებობის პირებმა 9 სულიან ოჯახს ახალი წელი მიულოცეს და საჩუქრები გადასცეს. ლორთქიფანიძეები ამ დრომდე, ერთ პატარა ოთახში ცხოვრობენ, თუმცა 2020 წელს მათი ცხოვრება რადიკალურად შეიცვლება. ოჯახს საკუთარ ეზოში ახალი სახლის მშენებლობა უკვე დაწყებული აქვს, რომელსაც ხარაგაულის მერის სარეზერვო ფონდიდან გამოყოფილი 10 000 ლარით აშენებენ. 31 დეკემბერს ხარაგაულის მერმა, ნიკოლოზ თოფურიძემ და მერიის ეკონომიკისა და ქონების მართვის სამსახურის უფროსმა ჯაბა ბერაძემ, ახალი წელი მიულოცეს და საახალწლო ნობათი გადასცეს ასევე, მუნიციპალიტეტში მცხოვრებ კიდურების გარეშე დარჩენილ მურმან ხიჯაკაძესა და გოჩა ბოგვერაძეს. მეორე წელია ხარაგაულის მერი აღნიშნული სტატუსის მქონე პირებს პირადად სტუმრობს და მათ განსაკუთრებულ მხარდაჭერას უცხადებს. მურმან ხიჯაკაძეს, რომელმაც ორივე ფეხი აფხაზეთის ომში მიღებული ტრავმის შედეგად დაკარგა, მეუღლე და სამი შვილი ყავს. ხიჯაკაძეების ოჯახმა, მერის და მერიის სამსახურების უფროსების დახმარებით ეზოში დამხმარე ნაგებობის აშენება და გადახურვა შეძლო. გოჩა ბოგვერაძე სოფელ იგორეთში მარტო ცხოვრობს. მან ერთი ხელი და ერთი ფეხი უბედური შემთხვევის შედეგად დაკარგა. მარტოხელა კაცს, რომელიც ინვალიდის ეტლში ზის შეჩერებული აქვს სოციალური დახმარება. ნიკოლოზ თოფურიძე გოჩა ბოგვერაძეს დაპირდა, რომ მერია  კიდევ ერთხელ დაუყოვნებლივ გააგზავნის შუამდგომლობის წერილს სოციალური დაცვის სააგენტოში და მას პირად კონტროლზე აიყვანს.  კიდურებს გარეშე დარჩენილ მოქალაქეებზე საახალწლო სოციალური აქცია ხარაგაულში კვლავ გაგრძელდება. ახალი წლის წინა დღეებში, მერიის ადგილობრივი ბიუჯეტიდან მუნიციპალიტეტში მცხოვრებ უკიდურესად გაჭირვებულ 208 ოჯახს ერთჯერადი დახმარების სახით ფულადი თანხა ჩაერიცხა. საერთო ჯამში - 10 400 ლარი. საახალწლო ნობათი დაურიგდა ასევე, ხარაგაულის სათნოების სახლის ბენეფიციარებს, სულ  73 პირს. ტრადიციული საშობაო ალილოს  ფარგლებში, 7 იანვარს, საახალწლო ნობათი გადაეცემა ასევე, მუნიციპალიტეტში მცხოვრებ სოციალურად დაუცველ 225 ოჯახს, რომლის საერთო თანხამ 4 900 ლარი შეადგინა. ხარაგაულის მერია განსაკუთრებული სითბოთი და სიყვარულით ულოცავს მუნიციპალიტეტში მცხოვრებ შეჭირვებულ ოჯახებს ახალ, 2020 წელს და შესაძლებლობის ფარგლებში მათ გამორჩეულ მხარდაჭერას უცხადებს.  

დღეს ხარაგაულის მთავარ საახალწლო ღონისძიებაზე, მუნიციპალიტეტის საპატიო მოქალაქეები აირჩიეს. ხარაგაულის მერის, ნიკოლოზ თოფურიძის ბრძანების საფუძველზე „ხარაგაულის საპატიო მოქალაქის“ წოდება მიენიჭათ. საზოგადო მოღვაწეს, რუმინეთში მოღვაწეს,  პოეტს, მწერალს და მთარგმნელს, წარმოშობით ხარაგაულელს, ქალბატონ ზაირა სამხარაძეს! ლევან ცუცქირიძეს, მხატვარს და პროფესორს, საქართველოს ღირსეულ მოქალაქეს, სოფელ მოლითის მკვიდრს! ქალბატონ იზა ვეფხვაძეს, რეზო თაბუკაშვილის სახელობის ლიტერატურული თეატრის დამაარსებელს, რეჟისორს, სცენარისტს, მსახიობს, რამდენიმე წიგნის ავტორს და ხარაგაულისთვის ღირსეულ მოქალაქეს! ზურაბ გოლუბიანს, ხარაგაულის მკვიდრს, დამსახურებულ ფარმაცევტს, საქართველოს ღირსეულ მოქალაქეს! საქართველოს სპორტის დამსახურებულ მწვრთნელს, ვეტერან კალათბურთელს, წარმოშობით სოფელ ლაშეს მკვიდრს, ბატონ ზურაბ სამხარაძეს! ულინა კაციტაძეს - მედიცინის დამსახურებულ მუშაკს, ხრაგაულელებზე დიდი ამაგის მქონე ქალბატონს, საქართველოს ღირსეულ მოქალაქეს! საპატიო ხარაგაულელების კანდიდატების დამტკიცებას სპეციალური კომისია უზრუნველყოფს, რომლის თავმჯდომარეც გახლავთ, ასევე ხარაგაულის საპატიო მოქალაქე ბატონი იუზა კელენჯერიძე. ხარაგაულის მუნიციპალიტეტის მერმა ნიკოლოზ თოფურიძემ, საპატიო ხარაგაულელებს სპეციალური სიგელები და საპატიო მოქალაქის წოდების დამადასტურებელი დიპლომები გადასცა.   დღეს არჩეულ თოთოეულ წევრზე, მათ ღვაწლსა და დამსახურებაზე ისაუბრეს ირინე ჩხეიძემ, მერი გიორგიძემ, ვალერი გოგნაძემ, ინგა მაღრაძემ, ეკა შველიძემ და გივი თხელიძემ.   ღონისძიებას დაესწრო ბელგიისა და ჰოლანდიის ეპისკოპოსი დოსითეოსი.

ხარაგაულში საახალწლო ღონისძიებები 25 დეკემბრიდან დაიწყო, ამ დღეს განათდა ხარაგაულის ნაძვის ხე და საახალწლოდ მოირთო ქუჩები. პირველი კონცერტი ხარაგაულის სამუსიკო სკოლის აღსაზრდელებმა მუსიკალურ ბენდ „გრავე“-სთან ერთად წარმოადგინეს. ღონისძიებამ მაყურებლის დიდი მოწონება და ოვაციები დაიმსახურა. ხარაგაულის თოჯინების თეატრმა საახალწლოდ ორი სოფლის პატარები გაახარა და „ფისუნია კიკის საახალწლო თავგადასავალი“ წარუდგინა. 26 დეკემბერს, ხარაგაულის კინოთეატრში საჯარო სკოლების მონაწილეობით საახალწლო კარნავალი ჩატარდა. კარნავალში დაბის #2 საჯარო სკოლამ და ანდრია პირველწოდებულის სახელობის გიმნაზიამ მიიღო მონაწილეობა. წლის შემაჯამებელი საახალწლო ღონისძიება გამართა, 27 დეკემბერს, ხარაგაულის მოსწავლე-ახალგაზრდობის სახლმა, რომელშიც ყველა თაობის აღსაზრდელები იღებდნენ მონაწილეობას. ღონისძიებაზე საქართველოს კუთხეებისთვის დამახასიათებელი წეს-ჩვეულებები და ტრადიციები იუმორისტული ნომრებით იყო წარმოდგენილი. ხარაგაულელებს ახალი წელი მიულოცა ქართველმა თოვლის ბაბუამ და კონცერტში მონაწილე აღსაზრდელები საჩუქრებით დააჯილდოვა. 27 დეკემბრის ჩათვლით, საახალწლო ზეიმები ჩატარდა მუნიციპალიტეტის ყველა საბავშვო ბაღში, რომლის ფარგლებშიც ხარაგაულის სოფლებში მცხოვრებმა 200-ზე მეტმა ბავშვმა საახალწლო საჩუქრები მიიღო.  30 დეკემბერს, ხარაგაულის კინოთეატრშიმ 16 საათზე ჩატარდება ხარაგაულის კულტურის ცენტრის მიერ ორგანიზებული საშობაო-საახალწლო კონცერტი, რომელშიც ცენტრთან არსებული შემოქმედებითი ჯგუფები და ინდივიდუალური შემსრულებლები მიიღებენ მონაწილეობას, ღონისძიებაზე აირჩევენ საპატიო ხარაგაულელებს.   31 დეკემბერს, 17 საათზე საბავშვო თეატრი „მოდუსი“ საახალწლო ნაძვის ხესთან პატარებისთვის ზღაპრის გმირების შოუს წარმოგვიდგენს. ამავე დღეს ღია ცის ქვეშ გაიმართება კონცერტი და ელექტრონული მუსიკის ერთ საათიანი პროგრამა. 31 დეკემბერს ღონისძიებების პარალელურად ნაძვის ხესთან მურაბების ფესტივალი ჩატარდება.  #ხარაგაულისმუნიციპალიტეტისმერია #გილოცავთდამდეგშობა_ახალ წელს

სოფელ ლეღვნის ცენტრალური გზა აღდგენილია!  ხარაგაულის მუნიციპალიტეტში 7 ივნისს მოსულმა ძლიერმა წვიმამ, მნიშვნელოვნად დააზარალა სოფელ ლეღვნის ცენტრალური გზა. მოსახლეობა ამ დრომდე სპეციალურად მოწობილი ალტერნატიული გზით გადაადგილდებოდა. გზის აღდგენითი სამუშაოები სტიქიის ფონდით დაფინანსდა, პროექტის ფარგლებში გზის ორ მონაკვეთზე მოეწყო ნაპირსამაგრი გაბიონი და საყრდენი კედელი, ასევე ჩაწყვეტილ ნაწილზე დაიგო ბეტონის საფარი. საერთო ჯამში პროექტის ღირებულებამ ნახევარ მილიონ ლარს მიაღწია.

 ხარაგაულის მუნიციპალიტეტში 2019 წელს უპრეცედენტო რაოდენობის, მასშტაბური პროექტები და პროგრამები დაფინანსდა.  დაიწყო და აქტიურ ფაზაში მიმდინარეობს შიდა სახელმწიფოებრივი მნიშვნელობის ძირულა-ხარაგაული-ფონა-ჩუმათელეთის 50 კილომეტრიანი გზის კაპიტალური რეაბილიტაცია.  დაიწყო ხევი-უბისას 12 კილომეტრიან მონაკვეთზე ავტობანის მშენებლობა, რომელიც 35 ახალი ხიდისა და 18 გვირაბის მშენებლობას მოიცავს.  წინა მოსამზადებელი სამუშაოები მიმდინარეობს ღორეშა-ბაზალეთის გზის 11 კილომეტრიან მონაკვეთზე, რომლითაც ისარგებლებენ, როგორც ადგილობრივები, ასევე ხარაგაულის ცენტრი, ბაზალეთი-სარგვეში-ღორეშას მიმართულებით, უმოკლესი გზით, ცენტრალურ საავტომობილო მაგისტრალს დაუკავშირდება.  მუნიციპალური გზების რეაბილიტაციისთვის, 2019 წელს, ხარაგაულში, 4 799 392 ლარი დაიხარჯა. დაიგო 27 კილომეტრი გზა, 22 სოფელში.  რეაბილიტაცია ჩაუტარდა ოთხი სოფლის - ვახანის, ფარცხნალის, ხიდრის და წყალაფორეთის სამედიცინო ამბულატორიას.  სველი წერტილები მოეწყო და კოსმეტიკური რემონტი ჩაუტარდა მუნიციპალიტეტის 10 საჯარო სკოლას.  ხარაგაულის მუნიციპალიტეტში განხორციელდა ორი სოფლის ლაშეს და კიცხის გაზიფიცირების სამუშაოები, პროექტის დასრულების შემდეგ ხარაგაულში დამატებით, 621 აბონენტი იქნება უზრუნველყოფილი ბუნებრივი აირით.  გაიხსნა ერთი ახალი საბავშვო ბაღი სოფელ სარგვეშში, საჯარო სკოლის შენობაში, რომელიც 15 აღსაზრდელზეა გათვლილი.  გაიხსნა ერთი სკოლამდელი მზაობის ჯგუფი მაღალმთიან სოფელ გედსამანიაში.  მიმდინარე წელს დაფინანსდა და დაიწყო ორი საბავშვო ბაღის მშენებლობა ვერტყვიჭალასა და საღანძილეში, რომელსაც მუნიციპალური განვითარების ფონდი აფინანსებს.  მუნიციპალური განვითარების ფონდით დაფინანსდა წელს, ასევე, საჯარო სკოლისთვის ახალი შენობის აშენება სოფელ კიცხში.  დაბა ხარაგაულში სპორტ სკოლის მიმდებარე ტერიტორიაზე დაიწყო საზოგადოებრივი ცენტრის მშენებლობა.  სტიქიის პრევენციის მიზნით, სოფლებში მოეწყო ნაპირსამაგრი გაბიონები, საყრდენი კედლები და სანიაღვრე არხები.  აშენდა 5 ახალი ხიდბოგირი, მიმდინარეობს 4 ხიდბოგირის რეაბილიტაცია.  სტიქიის ფონდით დაფინანსდა ორი ახალი ხიდის მშენებლობა სოფელ ლეღვანსა და ლაშეში. ლეღვნის ხიდის მშენებლობა აქტიურ ფაზაშია, ლაშეში ხიდის მშენებლობის მიზნით ტენდერი დასრულებულია და სამუშოები უახლოეს მომავალში დაიწყება.  წყლის სისტემების რეაბილიტაციის მიზნით, მერიამ მოსახლეობის მოთხოვნებიდან გამომდინარე შეისყიდა წყლის მილები, დაახლოებით 40 000 მეტრი და წყლის რეზერვუარები.  დაბაში მოწესრიგდა ერთი მრავალბინიანი კორპუსის ფასადი ადგილობრივი ბიუჯეტით.  განხორციელდა დაბა ხარაგაულის ტერიტორიაზე 10 სკვერის კეთილმოწყობა-რეაბილიტაცია რომლის ღირებულებამ 100 000 ლარი შეადგინა.  გაიხსნა საბალეტო სტუდია ადგილობრივი ბიუჯეტის დაფინანსებით, მოზარდებს თბილისიდან მოწვეული ბალეტმეისტერი ამეცადინებს. სტუდია წარმატებით ფუნქციონირებს.  გაიხსნა ზრდასრულთა განათლების ცენტრი! სახალხო უნივერსიტეტთა გერმანული ასოციაციის” დაფინანსებით, DVV International-ის და ადგილობრივი თვითმმართველობის მხარდაჭერით, სადაც 10-მდე სხვადასხვა სახის ხელობას ასწავლიან უფასოდ.  ხარაგაულელი ახალგაზრდების ინიციატივით, USAID -ის დაფინანსებით, საქართველოს ეკოტურიზმის ასოციაციის ორგანიზებითა და ადგილობრივი თვითმმართველობის მხარდაჭერით ბორჯომ-ხარაგაულის ტყე-პარკის მიმდებარე სოფლებში, მარელისსა და ლეღვანში ეკოტურიზმის განვითარებისთვის მნიშვნელოვანი პროექტი განხორციელდა, რომლის ფარგლებშიც მოხდა მოსახლეობის გადამზადება სხვადასხვა მიმართულებით. განხორციელდა უპრეცედენტო პროექტი ხარაგაულის საბავშვო ბაღებში, კერძოდ, პროექტის - „ალტერნატიული ენერგიის წყაროები და მისი გავლენა ადგილობრივი თემის განვითარებაზე“ ფარგლებში, ოთხ ბაღში დამონტაჟდა მზის ენერგოეფექტური პანელები. პროექტი არასამთავრობო ორგანიზაცია „ქალები ქვეყნის მომავლისათვის“ ინიციატივით, BP-ის დაფინანსებითა და ადგილობრივი თვითმმართველობის მხარდაჭერით განხორციელდა.

  1.  17 დეკემბრიდან 27 დეკემბრის ჩათვლით - საახალწლო კონცერტები ბაღების გაერთიანებაში- 12 სთ;   2.  24 დეკემბერი - ხარაგაულის თოჯინების  თეატრის  საახალწლო  სპექტაკლი სოფელ  თეთრაწყაროში - 11 სთ;   3.  25 დეკემბერი - სამუსიკო სკოლის და მუსიკალური ბენდის საახალწლო კონცერტი - 15 სთ;   4.  26 დეკემბერი - ტრადიციული საახალწლო კარნავალი საჯარო სკოლების მონაწილეობთ - 15 სთ, კინოთეატრის შენობა.   5.  27 დეკემბერი - მოსწავლე-ახალგაზრდობის სახლის საახალწლო კონცერტი - 15 სთ. ხარაგაულის კინოთეატრში.   6.  30 დეკემბერი - კულტურისა და ხელოვნების ცენტრის საახალწლო კონცერტი - 16 სთ, კინოთეატრში.   7.  31 დეკემბერი -  ხარაგაულის მუნიციპალიტეტის მერია გიწვევთ ანიმაციური გმირების საახალწლო შოუზე პატარებისთვის, რომელიც ნაძვის ხესთან, 17 საათიდან დაიწყება. შოუს     დასრულების შემდეგ  საახალწლო განწყობა კონცერტით გაგრძელდება, 31 დეკემბრის  ღონისძიებების პარალელურად ნაძვის ხესთან, ღია ცის ქვეშ გაიმართება  მურაბების ფესტივალი.   8.  7 იანვარი - ტრადიციული საშობაო ალილო.