ხარაგაულის მუნიციპალიტეტის მერმა, ნიკოლოზ თოფურიძემ, პირველ მოადგილესთან არჩილ მაღრაძესთან ერთად, ნადაბურის ადმინისტრაციულ ერთეულში მიმდინარე ინფრასტრუქტურული პროექტები მოინახულა. მუნიციპალიტეტის ხელმძღვანელი პირები ნადაბურის საავტომობილო გზის მშენებლობის პროცესს ადგილზე გაეცნენ, სადაც ბეტონის საფარის დაგება მიმდინარეობს. პროექტი რეგიონული განვითარების ფონდიდან 578 498 ლარით ფინანსდება, რომლის ფარგლებში რეაბილიტაცია ჩაუტარდება 5 428 მეტრიან გზას. სამუშაოებს  შპს „საპოვნელა“ ასრულებს. პირველმა პირებმა, ასევე, მოინახულეს ხიდ-ბოგირებისა და ციციქიურის უბანში  გაბიონის მშენებლობის პროცესი, რომლებზეც სამშენებლო სამუშაოები უახლოეს მომავალში დასრულდება. ნადაბურის ადმინისტრაციულ ერთეულში ოთხ ხიდ-ბოგირს უტარდება რეაბილიტაცია. პროექტის ღირებულება 60 000 ლარია, რომელიც სტიქიის სალიკვიდაციო ფონდიდან არის დაფინანსებული. ციცქიურში გაბიონის აღდგენითი სამუშაოები აქტიურ ფაზაში მიმდინარეობს, პროექტის ღირებულება 69 800 ლარს შეადგენს და დაფინანსებულია სტიქიის სალიკვიდაციო ფონდიდან. სამუშაოებს ასრულებს  „ლოდი პლიუსი“.

ხარაგაულში ზრდასრულთა განათლების ცენტრი გაიხსნება. სასწავლებელში მსურველები მეფუტკრეობას, ხეზე კვეთას, ტრადიციულ ქართულ სამზარეულოს,  ფეხსაცმლის დიზაინს, თექისა, ჭრა-კერვის, ქსოვისა (მაკრამეს) და  ხალხურ ინსტრუმენტზე დაკვრის სამ თვიან კურსს გაივლიან. სასწავლებელში 18 წლის ზემოთ მოქალაქეები მიიღებიან, რომლებიც უფასოდ შეისწავლიან მათთვის სასურველ პროფესიას. დაინტერესებულმა პირებმა უნდა წარადგინონ განცხადება და პირადობის მოწმობა სასწავლებლის ადმინისტრაციაში. სასწავლებელი განთავსებულია სოლომონ მეფის N19 -ში, პოლიციის ყოფილ ძველ შენობაში, რომელსაც ჩაუტარდა შესაბამისი სარემონტო სამუშაოები და ასევე აღიჭურვა საჭირო ავეჯით. არასამთავრობო ორგანიზაციის „წიფლარის“ დამფუძნებლისა და პროექტის კოორდინატორის მანანა ტაბაშიძის ინფორმაციით  სასწავლებელში  მსურველთა საბუთების მიღება უკვე მიმდინარეობს და ჯგუფების ჩამოყალიბების შემდეგ  სწავლება დაიწყება. პროექტი ხარაგაულში არასამთავრობო ორგანიზაცია „წიფლარი“ სახალხო უნივერსიტეტთა გერმანული ასოციაციის  საქართველოს ოფისის საგრანტო დაფინანსებით ხორციელდება. საქართველოში, სახალხო უნივერსიტეტთა გერმანული ასოციაციის საქართველოს ოფისის დაფინანსებით, სულ თერთმეტი პროფესიული  სასწავლებელია შექმნილი. ხოლო იმერეთის რეგიონში პირველი ხარაგაულია.

ხარაგაულის მუნიციპალიტეტში ინფრასტრუქტურული პროექტის ფარგლებში, 11 სკვერის სარეაბილიტაციო სამუშაოები დაიწყო. პროექტის ფარგლებში დაგეგმილია განათების სისტემის, ძელ-სკამებისა და დაზიანებული ბორდიურების აღდგენა. პატარა ხარაგაულის სკვერში გათვალისწინებულია პატარებისთვის სათამაშო ატრაქციონის დამონტაჟება და სპორტული მოედნის მოწყობა.  მთლიანად განახლდება ხარაგაულის მერიის წინ მდებარე სკვერი. პროექტის ღირებულება 168 778 ლარს შეადგენს, რომელსაც ტენდერში გამარჯვებული კომპანია შპს „ჭედა“ ასრულებს. სამუშაოები აპრილის ბოლოს დასრულდება. ხარაგაულში არსებული სკვერები: 1. ჩოხოსნების სკვერი; 2. თამაზ კიკნაძის სახელობის სკვერი; 3. მერიის წინ, 9 აპრილის ქ. N15-ში მდებარე სკვერი; 4. ვეფხვია ღონღაძის სახელობის სკვერი; 5. დაბაში, ცენტრალური პარკის წინ მდებარე სკვერი (მემორიალთან); 6. დაბაში 9 აპრილის სახელობის სკვერი (ხარაგაულის სახანძრო-სამაშველო განყოფილებასთან); 7. ე.წ. „დევების სკვერი“ 8. ევგენი ხარაძის სახელობის სკვერი; 9. ეკლესიისკენ მიმავალ გზაზე მდებარე სკვერი; 10. პატარა ხარაგაულში მდებარე სკვერი; 11. დაბაში სპორტსკოლის მიმდებარედ არსებული სკვერი. 

ევროპის ჩემპიონატზე თავისუფალი სტილით ჭიდაობაში ხარაგაულელმა ზაურ ბერაძემ მესამე ადგილი აიღო და ბრინჯაოს მედალი მოიპოვა. საქარველოს თავისუფალი სტილით მოჭიდავეთა 23 წლამდელთა ნაკრებმა სერბეთში მიმდინარე ევროპის ჩემპიონატში მიიღო მონაწილეობა. პირველ დღეს, ქართველმა ფალავნებმა 4 მედალი - 1 ვერცხლი და 3 ბრინჯაო მოიპოვეს. ხარაგაულელი ზაურ ბერაძემ (86 კგ) კი, 10 მარტს, გადამწყვეტ ბრძოლაში, ბელარუს პაჰასიანს 4-2 მოუგო და ბრინჯაოს პრიზიორი გახდა. ვულოცავთ ზაურ ბერაძეს ამ გამარჯვებას და წარმატებებს ვუსურვებთ!        

"სპორტისა და შიდა ტურიზმის ცენტრის" ორგანიზებით ხარაგაულის სპორტულ დარბაზში მუნიციპალიტეტის პირველობა საჯარო სკოლებს შორის მინი ფეხბურთში, ორი დღის განმავლობაში მიმდინარეობდა. ჩემპიონატში მონაწილეობა მიიღეს: ხარაგაულის სასულიერო გიმნაზის, მესამე საჯარო სკოლის, ბორითის, ზვარის, ვარძიის, ხიდრის, ბორის სკოლა პანსიონის, კიცხის და ლეღვნის საჯარო სკოლის გუნდებმა. 6 მარტს პირველ ნახევარფინალურ შეხვედრაში ვარძიის საჯარო სკოლამ  ბორითის გუნდი ანგარიშით 4:0 დამარცხა, ხოლო მეორე ნახევარფინალი ხიდრისა და N3 საჯარო სკოლის გუნდებს შორის გაიმართა, რომელიც დაბის სკოლის გამარჯვებით 3:1 დამთავრდა. 7 მარტს გამართულ ფინალურ შეხვედრაში ერთმანეთის ვარძიისა და  N3 საჯარო სკოლის გუნდები დაუპირისპირდნენ. თამაში ვარძიის გუნდის სასარგებლოდ 3:2 დასრულდა. მონაწილე გუნდებს სიგელები და სამახსოვრო საჩუქრები გადაეცათ.

6 მარტს ხარაგაულის საგანმანათლებლო  რესურსცენტრის უფროსმა, მარინე ვეფხვაძემ საჯარო სკოლების დირექტორებთან  სამუშაო შეხვედრა გამართა. შეხვედრას, სადაც სკოლების ინფრასტრუქტურული მდგომარეობა განიხილეს, მუნიციპალიტეტის მერიის ინფრასტრუქტურისა და კეთილმოწყობის სამსახურის უფროსი, თემური თაბუკაშვილი ესწრებოდა. ხარაგაულის საჯარო სკოლებს ინფრასტრუქტურის მოსაწესრიგებლად სახელმწიფო ბიუჯეტიდან 410 000 ლარი გამოეყო.  ამასთან ერთად, კიცხში ახალი სკოლა აშენდება, ხოლო წყალაფორეთის, ვერტყვიჭალისა და მარელისის სკოლების რეაბილიტაციას მუნიციპალური განვითარების ფონდი დააფინანსებს. როგორც შეხვედრაზე აღინიშნა თითქმის ყველა სკოლაში არის პრობლემები, თუმცა გამოყოფილი თანხით ყველა პრობლემის მოგვარება ვერ მოხერხდება. სწორედ ამიტომ 410 000 ლარი იმ სკოლებზე გადანაწილდება, რომელთაც გამოუვალი მდგომარეობა აქვთ. განსაკუთრებით მძიმე მდგომარეობაა დაბის N3 სკოლაში. მიმდინარეობს სამუშაოები დაფინანსების მოსაპოვებლად, რათა მოხდეს მისი სრული რეაბილიტაცია. საგანმანათლებლო რესურსცენტრის უფროსის, მარინე ვეფხვაძის ინფორმაციით, ამ ეტაპზე, მიმდინარეობს სახელმწიფო ბიუჯეტიდან გამოყოფილი თანხის სკოლებზე გადანაწილება. რა თქმა უნდა, პირველ რიგში, ის სკოლები დაფინანსდება, რომელთაც შედარებით რთული მდგომარეობა აქვთ.

სოფლის მხარდაჭერის პროგრამის ფარგლებში ბოლო საერთო კრება საღანძილის ადმინისტრაციული ერთეულის ექვს სოფელში ჩატარდა. ჯაფარაულის მოსახლეობამ გარე განათების მოწყობა და სასაფლაოს მიმდებარე ტერიტორიის შემოღობვა გამოყო პრიორიტეტად. საღანძილეში მესხების უბნის გზას მოაბეტონებენ. ზარანის მაცხოვრებლები გზისა და წყლის სისტემის რეაბილიტაციას ჩაატარებენ გვაძაბიების უბანში, მოეწყობა ასევე, სოფლის გზაზე გარე განათება. სხლითის მოსახლეობამ წისქვილების რეაბილიტაცია და გზების გასწორხაზოვნება-მოხრეშვა აირჩია, იგივე პროექტებს განახორციელებს ვანის მოსახლეობაც.  ჩხერში კი, სადაც მოსახლეობის მიერ სამი საპროექტო წინადადება იყო წარმოდგენილი, ფარული კენჭისყრით ცხოვრებაძეების, ლურსმანაშვილების და ხუტაშვილების უბანში სანიაღვრე არხისა და ცხაურის მოწყობა და გზის პატარა მონაკვეთის მობეტონება გადაწყდა. გამომდინარე იქედან, რომ აღნიშნულ სოფელში ორ პროექტზე ხმები თანაბარი რაოდენობით გადანაწილდა, გადაწყვეტილება მუნიციპალიტეტის მერმა მიიღო და გზის რეაბილიტაციას მიანიჭა პრიორიტეტი.  სოფლის საერთო კრებებს საღანძილის ადმინისტრაციული ერთეულის სოფლებში ხარაგაულის მერი, ნიკოლოზ თოფურიძე და მერის თანაშემწე, ლაშა გელაშვილი უძღვებოდნენ. იხილეთ ოქმი

„ქალს-გაზაფხულს“ მიეძღვნება ხარაგაულის მერიის კულტურის სამსახურისა და მუსიკალური სკოლის ორგანიზებით დაგეგმილი, მუსიკალურ ბენდ „გრავეს“ ღონისძიება, რომელიც კინოთეატრში, 6 მარტს, 15 საათზე ჩატარდება. „მამაკაცები აღმზრდელებად“ - საინტერესო გამოწვევა მიიღეს ხარაგაულელმა მამაკაცებმა, რომლებიც ქალთა დღეებისადმი მიძღვნილ კვირეულში, ერთ დღეს საბავშვო ბაღებში აღმზრდელებად გაატარებენ.ხარაგაულის გენდერული საბჭოსა და სკოლამდელ დაწესებულებათა გაერთიანების ერთობლივი პროექტი, 6 მარტს, დილის ცხრა საათიდან მუნიციპალიტეტის ყველა საბავშვო ბაღში განხორციელდება. ასევე, 6 მარტს, 14 საათიდან ხარაგაულის კინოთეატრის ფოეიში ქალთა ნამუშევრების გამოფენა მოეწყობა. 7 მარტს, სადღესასწაულო შეხვედრას მოუწყობენ, საბავშვო ბაღების ღვაწლმოსილ პედაგოგებს, მათ ვინც 40 წელზე მეტი ყველაზე საპასუხისმგებლო პროფესიას - ბავშვის აღზრდას მოახმარეს, ხარაგაულის მერია სიმბოლური საჩუქრებით დააჯილდოებს. ღონისძიება დაბის #1 საბავშვო ბაღში 12 საათზე დაიწყება.

სოფლის მხარდაჭერის პროგრამის ფარგლებში, საერთო კრება 19 ადმინისტრაციული ერთეულის 78 დასახლებაში ჩატარდა.  ძირითად პრიორიტეტად მოსახლეობამ შიდა საუბნო გზების მოხრეშვა-გასწორხაზოვნება, გარე განათების სისტემის მოწყობა, სასმელი წყლის სათავე ნაგებობების მოწყობა-რეაბილიტაცია და სასაფლაოების შემოღობვა აირჩია.  პროგრამის მეორე ეტაპზე, სოფლის მოსახლეობის მიერ არჩეული იდეები მერიის ინფრასტრუქტურის სამსახურში განიხილება, მომზადდება ხარჯთაღრიცხვები და პროექტები, რის შემდეგაც წარმოდგენილ პროექტებს მუნიციპალიტეტის საკრებულო გაეცნობა და დაამტკიცებს.  1 აპრილიდან სოფლის მხარდაჭერის პროგრამა სამუშაოების შესრულების ფაზაში გადავა. არჩეული პროექტები ერთ პირთან მოლაპარაკების გზით განხორციელდება.    

ხარაგაულის მუნიციპალიტეტს, მთავრობის #331 განკარგულებით, რომელიც 25 თებერვალს გამოიცა, დამატებით 530 000 ლარი გამოეყო. აღშნინული თანხით ხარაგაულში 4 ინფრასტრუქტურული პროექტი განხორციელდება. რეაბილიტაცია ჩაუტარდება ფარცხნალში, ბარის უბნის გზას, ბაზალეთში ნანიტაშვილებისა და შერგელაშვილების საუბნო გზას. მობეტონდება ასევე, ღუდუმექეთის ცენტრალური გზა და სოფელ დეისის მეორე უბნის 700 მეტრამდე მონაკვეთი.  გაცნობებთ, რომ ზემოთ ჩამოთვლილ ოთხივე პროექტზე ტენდერები უკვე გამოაცხადა ხარაგაულის მერიამ.