ხარაგაულში წყლის სისტემის რეაბილიტაცია იგეგმება. პროექტის შესაძენად საქართველოს რეგიონული განვითარების და ინფრასტრუქტურის სამინისტროს გაერთიანებული წყალმომარაგების კომპანიის მიერ გამოცხადებული ტენდერი უკვე დასრულებულია და გამარჯვებულ კომპანიასთან, შპს „არქ დიზაინ მშენთან“ - ხელშეკრულება გაფორმებული. პროექტის ღირებულება 180 000 ლარს შეადგენს. საპროექტო სამუშაოების განხორციელების ვადა ხელშეკრულების გაფორმებიდან 180 დღეში უნდა დასრულდეს. პროექტის ფარგლებში ლეღვნის სათავე ნაგებობიდან სოფელ დიდვაკეში, საღანძილესა და დაბა ხარაგაულში  შემომავალი წყლის სისტემის მაგისტრალის სრული რეაბილიტაცია მოხდება, რის შემდეგაც მოსახლეობა ხარისხიან წყალს 24 საათის განმავლობაში მიიღებს. მოხდება ასევე რეზერვუარის მოწყობა და კორპუსების შიდა გაყვანილობის აღდგენა. ხარაგაულში სულ, წყლის ორი სათავე ნაგებობაა: ლეღვნის და პატარა ხარაგაულის. ნალექის მოსვლის შემთხვევაში ლეღვნის სათავე ნაგებობაში წყალი იმღვრევა,  რის გამოც გაერთიანებული წყალმომარაგების კომპანიის ხარაგაულის სერვისცენტრი წყლის მიწოდებას აჩერებს და ეს გარკვეულ პრობლემებს უქმნის მოსახლეობას. მეორე სათავე ნაგებობა ხარაგაულის მუნიციპალიტეტის საკუთრებაშია და ამ წყლით მხოლოდ ახალი საავადმყოფო და მიმდებარე ტერიტორიაზე მცხოვრები მოსახლეობა სარგებლობს.

21 მარტს ხარაგაულის მუნიციპალიტეტის საკრებულოს რიგგარეშე სხდომა გაიმართა. სხდომაზე დეპუტატებმა, დღის წესრიგით გათვალისწინებულ, სამ საკითხზე იმსჯელეს. დეპუტატებს მერიის ინფრასტრუქტურის განვითარების განყოფილების უფროსმა, პეტრე შარიქაძემ ხარაგაულის მუნიციპალიტეტში 2019 წელს სტიქიის პრევენციული ღონისძიებების განსახორციელებლად ხარაგაულის მუნიციპალიტეტის მერის მიერ წარმოდგენილი პროექტების მოწონების შესახებ წარუდგინა საკითხი. საკრებულოს წევრებს მოსაწონებლად ის პროექტები წარედგინათ, რომლებიც თანხის გამოყოფის შემთხვევაში განხორციელდება. 1. სოფელ ბორითში ანგარის უბნის ხიდის და გზის დამცავი კონსტრუქციის მშენებლობა - 90 000 ლარი; სოფელ ღორეშაში მდინარისაგან გზის დამცავი კონსტრუქციის მშენებლობა - 60 000 ლარი; სოფელ ლეღვანში სახიდე გადასასვლელის და გზის დამცავი კონსტრუქციის მშენებლობა - 50 000 ლარი; სოფელ ვარძიაში სახიდე გადასასვლელი კონსტრუქციის მშენებლობა - 50 000 ლარი; სოფელ ვანში მდინარისაგან გზის დამცავი კონსტრუქციის მშენებლობა - 50 000 ლარი. საკრებულოს სხდომაზე, ასევე, განიხილეს შემდეგი საკითხები: ხარაგაულის მუნიციპალიტეტის საკრებულოს 2017 წლის 3 ივლისის N5/43 განკარგულებაში „საპრივატიზაციო ობიექტების ნუსხის დამტკიცების შესახებ“ ცვლილებების შეტანის თაობაზე; მომხსენებელი: ჯაბა ბერაძე ხარაგაულის მუნიციპალიტეტის საკრებულოს 2017 წლის 3 ივლისის N50/44 განკარგულებაში „ხარაგაულის მუნიციპალიტეტის საკუთრებაში არსებული უძრავი ქონების საპრივატიზაციო ობიექტთა გეგმის დამტკიცების შესახებ“ ცვლილებების შეტანის თაობაზე; მომხსენებელი: ჯაბა ბერაძე

ხარაგაულის მუნიციპალიტეტის მერი ნიკოლოზ თოფურიძე თბილისის სპორტულ-ქორეოგრაფიული ცენტრის „Dynamik-დინამიკა“-ს ბალეტმაისტერს, ინგა თოფლიშვილს შეხვდა, რომელიც ხარაგაულში მერის სპეციალური მოწვევით იმყოფებოდა. „ჯერ კიდევ სამი წლის წინ, როდესაც ხარაგაულში თანამდებობაზე მოვედი სულ მინდოდა საბალეტო წრე ყოფილიყო, ვფიქრობ, პლასტიკა ბავშვებისთვის აუცილებელია და ხარაგაულელებს ძალიან გაეხარდებათ საბალეტო სტუდიის გახსნა, მითუმეტეს, რომ ამის მოთხოვნა ნამდვილად არის! ქალბატონი ინგა კვირაში ორი დღე ჩაატარებს მეცადინეობებს და სტუდია ხარაგაულის კულტურის ცენტრთან იარსებებს. ზაფხულზე ჩვენ მოვაწესრიგებთ დარბაზს და შესაბამის ინფრასტრუქტურას. ყველაფერს გავაკეთებთ იმისთვის, რომ ახალი სასწავლო წლიდან, ანუ სექტემბრიდან, ხარაგაულში საბალეტო წრემ ფუნქციონირება დაიწყოს“- აღნიშნა შეხვედრაზე ნიკოლოზ თოფურიძემ. მერიის კულტურის სამსახურის უფროსი და ხარაგაულის სახალხო თეატრის რეჟისორი ირინე ჩხეიძე ამბობს, რომ პლასტიკა და საბალეტო ცეკვის ხელოვნება მსახიობებისთვისაც აუცილებელია და ქალბატონი ინგას გაკვეთილები თეატრსაც მნიშვნელოვნად გამოადგება. როგორც ბალეტმაისტერი ინგა თოფლიშვილი აღნიშნავს,  სტუდიაში 5-დან 8 წლამდე ასაკის ბავშვები მიიღებიან.

21 მარტს ხარაგაულის მუნიციპალიტეტის საკრებულოს რიგგარეშე სხდომა გაიმართება. სხდომაზე განხილული იქნება შემდეგი სამი საკითხი: ხარაგაულის მუნიციპალიტეტში 2019 წელს სტიქიის პრევენციული ღონისძიებების განსახორციელებლად ხარაგაულის მუნიციპალიტეტის მერის მიერ წარმოდგენილი პროექტების მოწონების შესახებ; მომხსენებელი: თემურ თაბუკაშვილი ხარაგაულის მუნიციპალიტეტის საკრებულოს 2017 წლის 3 ივლისის N5/43 განკარგულებაში „საპრივატიზაციო ობიექტების ნუსხის დამტკიცების შესახებ“ ცვლილებების შეტანის თაობაზე; მომხსენებელი; ჯაბა ბერაძე ხარაგაულის მუნიციპალიტეტის საკრებულოს 2017 წლის 3 ივლისის N50/44 განკარგულებაში „ხარაგაულის მუნიციპალიტეტის საკუთრებაში არსებული უძრავი ქონების საპრივატიზაციო ობიექტთა გეგმის დამტკიცების შესახებ“ ცვლილებების შეტანის თაობაზე; მომხსენებელი: ჯაბა ბერაძე აღნიშნული საკითხები ხარაგაულის მუნიციპალიტეტის საკრებულოს ბიურომ 20 მარტის სხდომაზე განიხილა.

ხარაგაულის უხუცეს ბებოს, შუშანა გელაშვილს 19 მარტს 102 წელი შეუსრულდა. მუნიციპალიტეტის უხუცეს ქალბატონს დაბადების დღე ხარაგაულის მერმა, ნიკოლოზ თოფურიძემ და ჯანდაცვისა და სოციალური დაცვის სამს ახურის უფროსმა, ნანა კიკნაძემ მიულოცეს. უხუცესი ქალბატონი სოფელ წაქვაში ცხოვრობს. მას 3 შვილიშვილი, 6 შვილთაშვილი და 8 შვილთაშვილის შვილი ჰყავს. ხოლო ერთადერთი შვილი სამი წლის წინ გარდაეცვალა, რომელსაც ყოველთვის დიდი გულისტიკივილით იხსენებს. ხარაგაულის უხუცესი ბებო, მეხუთე თაობის შთამომავლებში თავს კარგად გრძნობს და იუბილეს მათთან ერთად ბედნიერი ხვდება. ხარაგაულის მერია 100 წელს გადაცილებულ მოქალაქეებს ყოველწლიურად 500 ლარს ურიცხავს. იუბილარ ქალბატონს აღნიშნული თანხა პირად ანგარიშზე ჩაერიცხება.

დაიწყო გზის მშენებლობა სოფელ ვერტყვილაში, ბლიაძეებისა და გოგიაშვილების უბანში. პროექტის ფარგლებში კაპიტალური რეაბილიტაცია ჩაუტარდება გზის 1300 მეტრიან მონაკვეთს, რისთვისაც რეგიონული განვითარების ფონდიდან ადგილობრივი ბიუჯეტის თანადაფინანსებით 151 068 ლარი დაიხარჯება. სამუშაოებს ტენდერში გამარჯვებული კომპანია შპს „ბილდერი-2018“ ასრულებს.      

ხარაგაულის მუნიციპალიტეტის მერმა, ნიკოლოზ თოფურიძემ ინფრასტრუქტურისა და კეთილმოწყობის სამსახურის უფროსთან, თემური თაბუკაშვილთან და  ზედამხედველობისა და არქიტექურის სამსახურის უფროსთან, აფრასიონ ლურსმანაშვილითან ერთად, სოფელ ბუდიანეთში ცენტრალურ გზაზე მიმდინარე სარეაბილიტაციო სამუშაოები დაათვალიერა. ბუდიანეთში ბეტონის საფარი 900 მეტრიან მონაკვეთზე დაიგება. პროექტს რეგიონული განვითარების ფონდი აფინანსებს. სამუშაოები უახლოეს მომავალში დასრულდება.    

სამედიცინო კორპორაცია ევექსის ქუთაისის რეფერალური ჰოსპიტალი და დაავადებათა კონტროლისა და საზოგადოებრივი ჯანმრთელობის ეროვნული ცენტრის იმერეთის სამმართველო, ხარაგაულის მერიისა და საზოგადოებრივი ჯანდაცვის ცენტრის მხარდაჭერით, აპრილის თვეში, ხარაგაულის მუნიციპალიტეტის მოსახლეობისთვის უფასო სამედიცინო გამოკვლევებს ჩაატარებს.  აღნიშნულის შესახებ იმსჯელეს, 15 მარტს, ხარაგაულის მუნიციპალიტეტის მერთან, ნიკოლოზ თოფურიძესთან კლინიკა ევექსის რეგიონალურმა წარმოამადგენელმა, თამარ ჩინჩალაძემ, დაავადებათა კონტროლისა და საზოგადოებრივი ჯანმრთელობის ეროვნული ცენტრის იმერეთის სამმართველოს უფროსმა, გოჩა გიორგიძემ და ხარაგაულის საზოგადოებრივი ჯანდაცვის მუნიციპალური ცენტრის დირექტორმა შმაგი ხიჯაკაძემ.  თამარ ჩინჩალაძის ინფორმაციით, პირველ რიგში, 26 მარტს, ევექსის კლინიკაში მიიწვევენ მუნიციპალიტეტის მასშტაბით დასაქმებული ოჯახის ექიმებს, სადაც საინფორმციო ხასიათის შეხვედრასთან ერთად ექიმები ევექსის ქსელის სერვისებს გაეცნობიან და უშუალოდ ნახავენ გარემოს, თუ სად უწევთ მათ მიერ გამოგზავნილ პაციენტებს გამოკვლევების ჩატარება. ექიმების ვიზიტთნ დაკავშირებულ საორგანიზაციო ხარჯებს დაფარავს ევექსის ქსელი. რაც შეეხება უფასო სამედიცინო აქციას! გამოკვლევების ჩატარება იგეგმება ორ ზონაზე. ეს იქნება დაბის(ხარაგაული) ზონა და ცენტრალური საავტომობილო მაგისტრალის მიმდებარე სოფლების ზონა (ბორითი). პაციენტებს მოემსახურებიან ევექსის კლინიკის მაღალკვალიფიციური ექიმები და მათ შემდეგი სერვისების მიღების საშუალება ექნებათ: დაავადებათა ადრეული გამოვლენა და სკრინინგი, პროგრამის ფარგლებში, პრევენციული გამოკვლევები, საშვილოსნოს, კოლორექტალის, პროსტატის და მკერდის სისმსივნური დაავადებების პრევენციის მიზნით. ანგიოქირურგია; კარდიოლოგია; ენდოკრინოლოგიური სერვისი; გინეკოლოგიური სერვისი; ექსკოპია; ზოგადი ქირურგია. პაციენტებს საშუალება ექნებათ უფასოდ გაიარონ ექიმთან კონსულტაციები. ასევე, მნიშნელოვანია, რომ რადიოლოგები ადგილზე მოახდენენ დიაგნოსტირებას და დამატებითი კვლევების აუცილებლობის შემთხვევაში მოხდება პაციენტის გადამისამართება, რის შემდეგაც ისინი უკვე, საყოველთაო ჯანდაცვის პროგრამის ფარგლებში მიიღებენ საჭირო მომსახურებას.  როგორც კი ცნობილი გახდება ექიმების ვინაობა და თარიღი, რომელ დღეებში ჩატარდება გამოკვლევები, დაუყოვნებლივ გავავრცელებთ ინფორმაციას! 

ხარაგაულის მუნიციპალიტეტის მერმა, ნიკოლოზ თოფურიძემ საბე-სარგვეშის დამაკავშირებელი გზის    პროექტის განხორციელებას მოაწერა ხელი. საბე-სარგვეშის დამაკავშირებელი გზის  4კმ.-იანი მონაკვეთს კაპიტალური რეაბილიტაცია ჩატარდება, რომელიც რეგიონული განვიტარების ფონდიდან 600 000 ლარს შეადგენს. სამუშაოებს შპს „მიმდემი“ განახორციელებს.  სახელშეკრულებო ვადებით ორი სოფლის დამაკავშირებელი გზის მშენებლობა 2019 წლის აგვისტოს თვეში დასრულდება.      

18 მარტს საკრებულოს ბიუროს სხდომაზე ხარაგაულის მუნიციპალიტეტის მერიის ეკონომიკისა და ქონების მართვის სამსახურის ანგარიში განიხილეს. საკითხი ბიუროს წევრებს სამსახურის უფროსმა, ჯაბა ბერაძემ წარუდგინა. ანგარიშის მოსმენის შემდეგ სხდომა კითხვა-პასუხის რეჟიმის ფორმატში წარიმართა. დეპუტატ, ქეთევან ზუმბაძის განმარტებით ხარაგაულში არ არის ადგილი, სადაც  ახალგაზრდები სპორტულ ღონისძიებას გამართავენ, ვინაიდან სტადიონი, რომელიც მსგავსი ღონისძიებებისთვის იყო განსაზღვრული დაზიანებულია და აღდგენას საჭიროებს. დეპუტატი ყოფილი სპორტული მოედნის  ღია ბადეებით დაინტერესდა, რომელიც რამდენიმე წლის წინ ახსნენს და  საბავშვო ბაღების შემოსაღობად გამოიყენეს. ჯაბა ბერაძის განმარტებით, არ არსებობს შესაბამისი დოკუმენტაცია რა რაოდენობის მავთულის ბადეები დასაწყობდა, ან ვისი ბრძანებით გადაეცა ის საბავშვო ბაღებს. საკრებულოს საფინანსო-საბიუჯეტო კომისიის თავმჯდომარე ვარლამ ჭიპაშვილი, აღნიშნავს, რომ ეკონომიკისა და ქონების მართვის სამსახურმა ამ დრომდე ვერ გაითვალისწინა სახელმწიფო აუდიტის რეკომენდაცია და ვერ უზრუნველყო მუნიციპალური ქონების ინვენტარიზაცია. მისივე განცხადებით სამსახურმა ასევე, საკრებულოს დღემდე ვერ წარუდგინა მუნიციპალიტეტის განვითარების ეკონომიკური გეგმა, რომელიც მუნიციპალიტეტის შემოსავალების ზრდაზე იქნებოდა ორიენტირებული.    ქონების მართვის სამსახურის უფროსის განცხადებით, ხარაგაულის მერის ბრძანების საფუძველზე მუნიციპალიტეტის ქონების ინვენტარიზაციის პროცესი დაწყებულია, მხოლოდ, პირველ რიგში, ეს პროცესი ხარაგაულის ა(ა)იპ-ებში მიმდინარეობს. ჯაბა ბერაძე აღნიშნავს, რომ ამისთვის შექმნილია სპეციალური კომისია, რომელიც დეტალურად ახდენს ქონების აღწერას და დანიშვნას. რაც შეეხება მუნიციპალიტეტის ეკონომიკური განვითარების გეგმას ჯაბა ბერაძემ ხაზგასმით განმარტა, რომ მუნიციპალიტეტი 2019 წლის დასაწყისიდან ჩაერთო ევროკავშირის მიერ დაფინანსებულ პროექტში "მერები ეკონომიკური ზრდისთვის", რომლის ფარგლებშიც უნდა შემუშავდეს ეკონომიკური განვითარების გეგმა.  ეკონომიკის და ქონების მართვის სამსახურმა გარკვეული მონახაზი უკვე შეიმუშავა და, ვფიქრობთ სექტემბრის თვეში წარვუდგენთ საკრებულოს დასამტკიცებლად. სხდომაზე ბიუროს წევრებმა მეორე საკითხად განიხილეს ხარაგაულის მუნიციპალიტეტის მერიის სამხედრო აღრიცხვისა და გაწვევის სამსახურის ანგარიში, რომელიც ამავე სამსახურის უფროსმა, დავით დევდარიანმა წარადგინა. დავით დევდარიანის ინფორმაციით 2018 წელს სახელმწიფო გეგმა-დავალებით  ხარაგაულიდან განსაზღვრული იყო 45 წვევამდელის ჩარიცხვა საქართველოს შეირაღებული ძალების სამხედრო დანაყოფებში, სადაც ხარაგაულიდან 52 წვევამდელი ჩაირიცხა. სხდომაზე ასევე განიხილეს საბიუჯეტო ცვლილება, რომელიც სახაზინო საბიუჯეტო დაგეგმარების განყოფილების უფროსმა, ნინო მაღლაკელიძემ წარადგინა. ბიუროს სხდომაზე წარმოდგენილ საკითხებს საკრებულოს კომისიები განიხილავენ და 1 აპრილს საკრებულოს მორიგ სხდომაზე წარადგენენ დასამტკიცებლად.