პროექტის - „ცოცხალი წიგნები“ ფარგლებში, ხარაგაულს თანამედროვე მწერლების ჯგუფი - მანანა ჩიტიშვილი (პოეტი), გიორგი ლობჟანიძე (პოეტი, მთარგმნელი), ბექა ქურხული (პროზაიკოსი), გიორგი არაბული (პოეტი), ბესო ხვედელიძე (პროზაიკოსი), ვასო გულეური (საბავშვო პოეტი, მთარგმნელი) და ნინია სადღობელაშვილი (მწერალი) ეწვევა. პროექტს მეხუთე წელია ა(ა)იპ კავშირი „პოეზიის მეგობართა კლუბი,“ მთელი საქართველოს მასშტაბით, განათლების, მეცნიერების, კულტურისა და სპორტის სამინისტროს მხარდაჭერით ახორციელებს.  შეხვედრაზე მწერლები დამსწრე საზოგადოებას თავიანთ შემოქმედებას გააცნობენ და მათთვის საინტერესო თემებზე ისაუბრებენ. ღონისძიება ხარაგაულის კინოთეატრში 27 მაისს, 13:00 საათზე, გაიმართება. დასწრება თავისუფალია.

ხარაგაულში ადგილობრივი მოსახლეობისთვის პროექტის „გზა კეთილდღეობისა და წარმატების მომტანია“ განხორციელება იწყება. პროექტი შიდა სახელმწიფოებრივი მნიშვნელობის ძირულა-ხარაგაული-ჩუმათელეთის გზის მშენებლობის ფარგლებში დაიგეგმა, რომელიც სამეწარმეო საქმიანობით დაინტერესებული მოქალაქეების დატრენინგებას გულისხმობს. ხარაგაულში გზის მშენებლობა დაახლოებით 2 წელი გასტანს, რომელიც გარკვეულ მატერიალურ შემოსავლის წყაროს წარმოადგენს. კერძოდ, პროექტის მიმდინარეობისას გზის მშენებლობაში ჩართულ და სხვა დაინტერესებულ  პირებს საჭიროება ექნებათ  ისარგებლონ საცხოვრებელი ინფრასტრუქტურით, კვების ობიექტებით  და ა.შ.  შესაბამისად, მცირე ტიპის სამეწარმეო საქმიანობის განვითარება მომგებიანი იქნება ადგილობრივი მაცხოვრებლებისთვის. სწორედ აქედან გამომდინარე მოსახლეობისათვის,  დაიგეგმა უფასო სწავლება/სემინარები, რომლის ფარგლებშიც  მოქალაქეები დაეუფლებიან   სამეწარმეო საქმიანობასთან დაკავშირებულ  ცოდნას და უნარ-ჩვევებს, რაც მათ საშუალებას მისცემს  მომავალში საკუთარი კერძო ბიზნესი დაიწყონ ან განავითარონ.  ტრენინგის მონაწილეებისათვის  საჭირო ტრანსპორტირების, სადილის და სხვა საორგანიზაციო ხარჯები დაიფარება ორგანიზატორი მხარის მიერ. განსაკუთრებით მნიშვნელოვანია ბიზნეს საქმიანობაში ჩართული იყოს 50%-ქალი.მუნიციპალიტეტის მერია უკვე ახორციელებს კითხვარების დარიგებას. პროექტის ორგანიზატორია, აზიის განვითარების ბანკი, საავტომობილო გზების დეპარტამენტი დახარაგაულის მუნიციპალიტეტის მერია. ტრენინგით დაინტერესების შემთხვევაში დაუკავშირდით  ხარაგაულის მუნიციპალიტეტის მერის თანაშემწეს გენდერულ საკითხებში ინგა ბერაძეს ან დარეკეთ ნომერზე: 599 44 20 57  

18 მაისს ხარაგაულის ისტორიული მუზეუმის ორგანიზებით ეროვნული სამოსის დღე ხარაგაულში კოსტიუმირებული მსვლელობით აღინიშნა.  ნაციონალურ სამოსში გამოწყობილ მუზეუმის თანამშრომლებს ხარაგაულელები გზადაგზა უერთებოდნენ. ღონისძიების ფარგლებში, კულტურის ცენტრის ორგანიზებით, ღია ცის ქვეშ, ანსამბლმა „ უბისმა“ ქართული ტრადიციული ცეკვები, ხოლო „საუნჯემ“- ფოლკლორული სიმღერები წარმოადგინა. ღონისძიებაზე ასევე შესრულდა ანა ჩხეიძის ელექტრონული მუსიკა. ამავე დღეს, მუზეუმების საერთაშორისო დღესთან დაკავშირებით ხარაგაულის ისტორიულ მუზეუმში პროექტი - "ღამე მუზეუმში" განხორციელდა.  პროექტის ფარგლებში, ფონდში დაცული XIX-XX საუკუნეში ტრადიციულ სამოსში გადაღებული ფოტოების და ნაციონალურ სამოსში გამოწყობილი თოჯინების გამოფენა მოეწყო. გამოფენის ფონზე, მუსიკის თანხლებით  კოსტიუმირებული პერფორმანსები და ფოლკლორული სიმღერები შესრულდა.  სპეციალურად ამ დღისთვის „მოხალისე გიდების“ პროექტის ფარგლებში მუზეუმის დამთვალიერებლებს ექსკურსია ახალგაზრდებმა მოუწყვეს.  მუზეუმის ხელმძღვანელმა, ნინო დიდიძემ კი სამუზეუმო ექსპონატების გამდიდრებაში შეტანილი წვლილსთვის რამდენიმე პიროვენბას სიგელები გადასცა.

საზოგადოებრივი ჯანმრთელობის დაცვის ცენტრის (დირექტორი შმაგი ხიჯაკაძე) ორგანიზებით, ხარაგაულში ორი დღის განმავლობაში მიმდინარეობდა ფარისებრი ჯირკვლის პათოლოგიების გამოკვლევები. აქცია, რომელიც  ხარაგაულის საჯარო სკოლის მეცხრე და მეათე კლასის მოსწავლეებისთვის ჩატარდა, დაბა ხარაგაულსა და სოფელ ბირითში გაიმართა. დაბა ხარაგაულში გამართულ აქციაში ჩართული იყვნენ ზედა ზონის, ხოლო ბორითში ტრასისპირა სოფლების მოსწავლეები. საზოგადოებრივი ჯანმრთელობის დაცვის ცენტრის წარმომადგენლის, თათია ბლუაშვილის ინფორმაციით, გამოკვლევებისთვის მოწვეული ჰყავდათ მედიცინის მეცნიერებათა დოქტორი, ენდოკრინოლოგ-რადიოლოგი, გულიკო ქაჯაია და ლაბორანტი, ქეთევან უბაშვილი. აქციის ფარგლებში სულ 259 ბენეფიციარი გამოიკვლიეს.

17 მაისს გამართულ საკრებულოს  ბიუროს მორიგ სხდომაზე, ბიუროს წევრებმა დღის წესრიგით გათვალისწინებული 7 საკითხი განიხილეს. სხდომაზე  ხარაგაულის მუნიციპალიტეტის საკრებულოს განათლების, კულტურის და ახალგაზრდულ საქმეთა კომისიის მიერ გაწეული მუშაობის შესახებ ანგარიში  ამავე კომისიის თავმჯდომარემ, დავით კიკნაძემ წარადგინა. მან  ვრცლად ისაუბრა კომისიის მიერ შემუშავებულ ინიციატივებზე, რეკომენდაციებსა და განხილულ საკითხებზე. ხარაგაულის მუნიციპალიტეტის მერიის ინფრასტრუქტურისა და კეთილმოწყობის სამსახურის ანგარიში წარადგინა ინფრასტრუქტურის განვითარების განყოფილების უფროსმა პეტრე შარიქაძემ. ანგარიშთან დაკავშირებით ბიუროს წევრებმა მუნიციპალიტეტში მიმდინარე ინფრასტრუქტურულ პროექტებზე გაამახვილეს ყურადღება. საკრებულოს წევრი იუზა კელენჯერიძე დაინტერესდა რა ბედი ელის დაბის ჩიხების რეაბილიტაციას, ასევე სანიაღვრე არხებისა და საყრდენი კედლების მოწყობას, რომელიც რეგიონული განვითარების ფონდიდან დაფინანსდა და სამუშაოები ამ დრომდე არ დასრულებულა. პეტრე შარიქაძის განმარტებით,  კომპანიამ ვერ შეასრულა აღებული ვალდებულება და მას, სავარაუდოდ, ხელშეკრულება შეუწყდება, ხოლო აღნიშნულ პროექტზე ტენდერი თავიდან გამოცხადდება. ფრაქციის „ძალა ერთობაშია“ წევრმა, ქეთევან ზუმბაძემ დაბა ხარაგაულში სკვერების რეაბილიტაციის საკითხზე ისაუბრა. დეპუტატის განმარტებით სკვერების რეაბილიტაციის პროექტი ჯერ არ დასრულებულა და  ჩოხოსნების სკვერის კედლებიდან უკვე საღებავები ჩამოდის. ინფრასტრუქტურის განვითარების განყოფილების უფროსის განცხადებით სკვერების რეაბილიტაციის პროექტი ჯერ ჩაბარებული არ არის და სკვერების მოწყობაზე სამუშაოები ახლაც მიმდინარეობს. ეკონომიკის, ქონების მართვისა და ინფრასტრუქტურის საკითხთა კომისიის თავმჯდომარემ, მალხაზ ფხალაძემ აღნიშნა, რომ მშენებელ კომპანიებს შესრულების ვადებში დარღვევები აქვთ, თუმცა ხელშეკრულებები არ უწყდებათ. „ხელშეკრულება მხოლოდ ერთ ინდმეწარმეს  შეუწყდა და იმასაც გადავადებაზე განცხადება არ ჰქონდა შემოტანილი. ხომ შეიძლება, კანონის ფარგლებში, მკაცრი ზომები გატარდეს არაკეთილსინდისიერი მეწარმეების მიმართ, რომ მომავალში იგივე აღარ გაიმეორონ“- აღნიშნა დეპუტატმა.   დეპუტატ დავით კიკნაძის თქმით, 100 000 ლარი გამოიყო მრავალბინიანი საცხოვრებელი სახლების ფასადების მოსაწესრიგებლად, თუმცა ამ დრომდე ეს პროექტი არ განხორციელებულა, იგი დაინტერესდა ვინ იღებს გადაწყვეტილებას მუნიციპალიტეტში, სად რა პროექტი უნდა განხორციელდეს. „ჩემი აზრით, პირველ რიგში უნდა მოწესრიგდეს იმ ბინის ფასადი სადაც ყველაზე მეტად ეს პრობლემა დგას, ვხედავთ, რომ ერთი და იგივე ბინებს უტარდებათ სარეაბილიტაციო სამუშაოები “ - განმარტა დეპუტატმა. საფინანსო-საბიუჯეტო კომისიის თავმჯდომარემ, ვარლამ ჭიპაშვილმა აღნიშნა, რომ ზოგჯერ საპროექტო-სახარჯთაღრიცხვო დოკუმენტაცია ხარვეზებით არის შესრულებული და დოკუმენტაცია კაბინეტებში დგება. მისი  განცხადებით,  პროექტი ინფრასტრუქტურის სამსახურმა კარგად უნდა შეისწავლოს და  ხარვეზიანი პროექტი არ უნდა მიიღოს. როგორც პეტრე შარიქაძე განმარტავს პროექტის დოკუმენტაციის მომზადების პროცესში დამპროექტებლებს შესაბამისი ადმინისტრაციული ერთეულის წარმომადგენელი დაყვება და მომზადებული პროექტი საბოლოოდ  ექსპერტიზას გადის.  ვარლამ ჭიპაშვილის თქმით, ანგარიშში აუცილებლად უნდა იყოს ასახული, თუ რის საფუძველზე ხდება ხელშეკრულებების გადავადებები, ასევე იგი უნდა მოიცავდეს ინფორმაციას გაცემულ ავანსებზე. გარდა ამისა ანგარიშში ნაჩვენები უნდა იყოს გამოიყო თუ არა ადგილობრივი ბიუჯეტიდან თანხა რომელიმე ინფრასტრუქტურული  პროექტის დასაფინანსებლად. ვარლამ ჭიპაშვილს აქვს ასევე კითხვა ა(ა)იპ „დასუფთავებისა და კეთილმოწყობის გაერთიანება“, რატომ ვერ უზრუნველყოფს გარე განათების სისტემის მოწესრიგებას. სხდომაზე  დეპუტატებმა აღნიშნეს, რომ ბევრ მუნიციპალიტეტში უკვე დაიწყო სოფლის მხარდაჭერის პროექტებზე  სამუშაოები, ისინი დაინტერესდნენ რა მდგომარეობაა ამ კუთხით ხარაგაულის მუნიციპალიტეტში. პეტრე შარიქაძის განცხადებით პროექტების მომზადება თითქმის დამთავრებულია ყველა ადმინისტრაციულ ერთეულში, ვადა 2 ივნისამდე აქვთ განსაზღვრული და პროექტების ჩაბარების შემდეგ სამუშაოები ინტენსიურად დაიწყება. ბიუროს სხდომაზე ასევე მოუსმინეს მერიის ეკონომიკისა და ქონების მართვის სამსახურის უფროსს, ჯაბა ბერაძეს, რომელმაც ხუთი საკითხი წარადგინა. ჯაბა ბერაძის ინფორმაციით მუნიციპალიტეტს მერს ესაჭიროება საკრებულოს თანხმობა, რათა სოფელ მოლითში მდებარე 2 069 კვ.მ არასასოფლო-სამეურნეო დანიშნულების მიწის ნაკვეთი ორი წლის ვადით, პირდაპირი განკარგვით  გადაეცეს კომპანია „აკორდს“ გზის მეორე ლოტის(მოლითი-ფონა ) მშენებლობისთვის საჭირო ტექნიკის განსათავსებლად. კომპანია წლიურად 5 500 ლარს გადაიხდის ადგილობრივ ბიუჯეტში. მან თანხმობა მოითხოვა ასვე სოფელ ხევში მდებარე 501 კვ.მ არასასოფლო-სამეურნეო დანიშნულების მიწის ნაკვეთისა და მასზე მდგარი შენობა-ნაგებობა 280 კვ.მ პირდაპირი განკარგვით, იჯარით, (აუქციონის გარეშე) ორი წლის ვადით  კომპანია hinan bridge construqcion co. ltd-სთვის გადასაცემად. ჯაბა ბერაძის განმარტებით შენობა სარიტუალო დარბაზისთვის იყო განკუთვნილი, თუმცა ამჟამად კარკასულ მდგომარეობაშია და არ მოიხმარს ადგილობრივი მაცხოვრებელი. კომპანია იჯარის სახით ყოველწლიურად 3 500 ლარს გადაიხდის. ჯაბა ბერაძის ასევე განმარტა, როკ კომპანია „სილქნეტს“ ორი წლის ვადით პირდაპირი განკარგვის წესით  სასყიდლით გადაეცემა ელექტრო საყრდენების ის ნაწილი, რაც კაბელის დასამაგრებლად არის საჭირო. სხდომაზე ასევე განიხილეს: 1.ხარაგაულის მუნიციპალიტეტის საკრებულოს 2017 წლის 3 ივლისის N50/44 განკარგულებაში „ხარაგაულის მუნიციპალიტეტის საკუთრებაში არსებული ქონების საპრივატიზაციო ობიექტთა გეგმის დამტკიცების შესახებ“ ცვლილების შეტანის თაობაზე მომხსენებელი: ჯაბა ბერაძე 2.. ხარაგაულის არასამეწარმეო (არაკომერციული) იურდიული პირის „სპორტისა და შიდა ტურიზმის ცენტრი“-სთვის სარგებლობის უფლებით (უზურფრუქტი) არსებობის ვადით დაბა ხარაგაულში სოლომონ მეფის ქუჩაზე (რიყე) მდებარე, 6615 კვ.მ არასასოფლო-სამეურნეო დანიშნულების მიწის ნაკვეთის (ს/კ 36.01.31.368) და მასზედ მდგარი შენობა-ნაგებობის N1-1798,83 კვ.მ ფართის გადასაცემად მუნიციპალიტეტის მერისთვის თანხმობის მიცემის შესახებ.  მომხსენებელი: ჯაბა ბერაძე ხარაგაულის მუნიციპალიტეტის საკრებულო ზემოთ აღნიშნულ საკითხებზე 3 ივნისის მორიგ სხდომაზე იმსჯელებს.  

16 მაისს ხარაგაულის ცენტრალური ბიბლიოთეკის სამკითხველო დარბაზში, პროექტის - ,,შეხვედრა ცნობილ ადამიანებთან" ფარგლებში, ფილოლოგიის მეცნიერებათა დოქტორთან, ტარიელ ფუტკარაძესთან შეხვედრა გაიმართა. ტარიელ ფუტკარაძე გახლავთ საქართველოს რესპუბლიკის პირველი მოწვევის უზენაესი საბჭოს წევრი, საქართველოს დამოუკიდებლობის აღდგენის აქტის ხელმომწერი, აკაკი წერეთლის სახელმწიფო უნივერსიტეტის პროფესორი და საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტის ქართული ცენტრის ხელმძღვანელი. გამოცემული აქვს ენათმეცნიერული ხასიათის 300-მდე სამეცნიერო ნაშრომი და 300-ზე მეტი პუბლიცისტური წერილი. ღონისძიებას ქუთაისის საჯარო ბიბლიოთეკის დირექტორის მოადგილე, რიტა წაქაძე, ხარაგაულის საგანმანათლებლო რესურსცენტრის უფროსი, მარინე ვეფხვაძე, მასწავლებლები, საჯარო სკოლის მოსწავლეები და  დაინტერესებული საზოგადოების სხვა წარმომადგენლები ესწრებოდნენ. შეხვედრაზე ტარიელ ფუტკარაძის წიგნის - „ქართველოლოგიის თანამედროვე გამოწვევები“ პრეზენტაცია გაიმართა, რომლის შესახებაც  აკაკი წერეთლის სახელობის უნივერისტეტის პროფესორებმა, ლუკა დვალიშვილმა და  წიგნის რეცენზენტმა, ეკა დადიანმა ისაუბრეს. მონოგრაფიაში საარქივო და სხვა დოკუმენტური წყაროების ანალიზის საფუძველზე აღწერილია რუსეთის იმპერიის 150-წლიანი საინფორმაციო ომი, რომელიც ქართველი ერის დასანაწევრებლად იყო მიმართული. ტარიელ ფუტკარაძემ  ყურადღება  არსებულ გამოწვევებთან საბრძოლველად სახელმწიფოს ქმედებების მნიშვნელობაზე გაამახვილა და წიგნში განხილულ მთავარ გამოწვევებზე ისაუბრა. ეს გამოწვევები გახლავთ: 1. საერთაშორისო აკადემიურ ველში ქართველი ერის ენობრივ-ეთნიკური ერთიანობის საწინააღმდეგო იდეოლოგემ(ებ)ის დაბალანსება /თავდაცვა საინფორმაციო ომში; 2. „რეგიონული ან უმცირესობის ენების შესახებ ევროპული ქარტიის“ რატიფიცირების კონტექსტში საქართველოს ენობრივი სიტუაციის ადეკვატური აღწერა; 3. რუსული ენობრივი პოლიტიკის წიაღში შექმნილი ტერმინოლოგიური დივერსიების განეიტრალებით სწორ სახელმწიფოებრივ ორიენტირთა გაბუნდოვნების თავიდან აცილება; 4. ქართული ენის პრესტიჟის შენარჩუნების მიზნითა და თანამედროვე გამოწვევების გათვალისწინებით, ქართული ენის ტექნოლოგიზება;  5. საქართველოს სახელმწიფო ენის – ქართველთა დედა-ენის, ქართული (ქართველური) სამწიგნობრო ენის – კონსტიტუციური სტატუსის დაცვის უზრუნველყოფა. შეხვედრის დასასრულს დამსწრე საზოგადოების წარმომადგენლებმა მათთვის საინტერესო კითხვებზე მიიღეს პასუხები და მადლობა გადაუხადეს ტარიელ ფუტკარაძეს მობრძანებისთვის  და ხარაგაულის ცენტრალური ბიბლიოთეკის დირექტორს, ნიკოლოზ მაჭავარიანს საინტერესო შეხვედრის ორგანიზებისთვის.

17 მაისს 11:00 საათზე, ხარაგაულის მუნიციპალიტეტის საკრებულოს ბიუროს მორიგი სხდომა გაიმართება. სხდომაზე განხილული იქნება 7 საკითხი: 1.ხარაგაულის მუნიციპალიტეტის საკრებულოს განათლების, კულტურის და ახალგაზრდულ საქმეთა კომისიის ანგარიში გაწეული მუშაობის შესახებ.  მომხსენებელი: დავით კიკნაძე 2.ხარაგაულის მუნიციპალიტეტის მერიის ინფრასტრუქტურისა და კეთილმოწყობის სამსახურის ანგარიში გაწეული მუშაობის შესახებ.  მომხსენებელი: თემური თაბუკაშვილი 3.ხარაგაულის მუნიციპალიტეტის საკუთრებაში არსებული, დაბა ხარაგაულში მდებარე ელექტრო საყრდენზე (ბოძებზე) საკომუნიკაციო ქსელის მოსაწყობად (საჰაერო ტრასით კაბელის გატარება) სააქციო საზოგადოება „სილქნეტისთვის“ ელექტრო საყრდენის (ბოძის) იმ ნაწილის, რაც კაბელის დასამაგრებლადაა საჭირო 2 წლის ვადით პირდაპირი განკარგვის წესით სასყიდლით (იჯარის ფორმით) სარგებლობის უფლებით გადასაცემად ხარაგაულის მუნიციპალიტეტის მერისთვის თანხმობის მიცემის შესახებ.  მომხსენებელი: ჯაბა ბერაძე 4.ხარაგაულის მუნიციპალიტეტის საკუთრებაში არსებული, სოფელ მოლითში მდებარე 2069 კვ.მ არასასოფლო-სამეურნეო დანიშნულების მიწის  ნაკვეთი (ს/კ36.17.33.328). პირდაპირი განკარგვით, იჯარით, (აუქციონის გარეშე) ორი წლის ვადით ღსს „სამშენებლო-სამრეწველო საინვესტიციო კორპორაცია „აკკორდის“ საქართველოში წარმომადგენლობის „აკკორდ ჯორჯიაა“-სთვის გადასაცემად ხარაგაულის მუნიციპალიტეტის მერიისთვის თანხმობის მიცემის შესახებ.   მომხსენებელი: ჯაბა ბერაძე 5.ხარაგაულის მუნიციპალიტეტის საკუთრებაში არსებული, სოფელ ხევში მდებარე 501 კვ.მ არასასოფლო-სამეურნეო დანიშნულების მიწის ნაკვეთის და მასზე მდგარი შენობა-ნაგებობა 280 კვმ (ყოფილი სარიტუალო სახლი)(ს/კ 36.05.31.202) პირდაპირი განკარგვით, იჯარით, (აუქციონის გარეშ) ორი წლის ვადით  კომპანია hinan bridge construqcion co. ltd-სთვის გადასაცემად ხარაგაულის მუნიციპალიტეტის მერისთვის თანხმობის მიცემის შესახებ.   მომხსენებელი: ჯაბა ბერაძე 6.ხარაგაულის მუნიციპალიტეტის საკრებულოს 2017 წლის 3 ივლისის N50/44 განკარგულებაში „ხარაგაულის მუნიციპალიტეტის საკუთრებაში არსებული ქონების საპრივატიზაციო ობიექტთა გეგმის დამტკიცების შესახებ“ ცვლილების შეტანის თაობაზე  მომხსენებელი: ჯაბა ბერაძე 7.ხარაგაულის არასამეწარმეო (არაკომერციული) იურდიული პირის „სპორტისა და შიდა ტურიზმის ცენტრი“-სთვის სარგებლობის უფლებით (უზურფრუქტი) არსებობის ვადით დაბა ხარაგაულში სოლომონ მეფის ქუჩაზე (რიყე) მდებარე, 6615 კვ.მ არასასოფლო-სამეურნეო დანიშნულების მიწის ნაკვეთის (ს/კ 36.01.31.368) და მასზედ მდგარი შენობა-ნაგებობის N1-1798,83 კვ.მ ფართის გადასაცემად მუნიციპალიტეტის მერისთვის თანხმობის მიცემის შესახებ.   მომხსენებელი: ჯაბა ბერაძე

საკონცერტო პროგრამა დატვირთული იყო ქართული-ტრადიციული ქორეოგრაფიული (ქორეოგრაფი რომან ბუაჩიძე) ცეკვებითა და ფოლკლორული(ლოტბარი მაია მაღრაძე) სიმღერებით. მაყურებლის დიდი მოწონება დაიმსახურა, როგორც ქორეოგრაფიულმა ცეკვებმა: „დავლურმა“  „აჭარულმა“ „რაჭულმა“  „ხორუმმა“ „უკრაინულმა“ და „აფხაზურმა“ ისე მრავალხმიანობით გაჯერებულმა ქართულმა ხალხურმა სიმღერებმა. კონცერტის დასასრულს ანსამბლ „საუნჯის“ ხელმძღვანელმა დალი მაღრაძემ ლოტბარ მაია მაღრაძესა და ქორეოგრაფ რომან ბუაჩიძეს მომავალი თაობის აღზრდა-განვითარებაში შეტანილი წვლილისთვის მადლობა გადაუხადა, ხოლო დამსწრე საზოგადოებას-ყურადღებისათვის.  

12 მაისს, ანდრიაობას, მთა რკინისჯვრის მოლოცვის ტრადიცია ხარაგაულელმა ახალგაზრდებმა, შოთა ხარატიშვილის ინიციატივით, თვრამეტი წლის წინ დაიწყეს.  2001 წლის 12 მაისს შოთა მარტო ავიდა მთა რკინის ჯვარზე. მომავალ წელს მეგობართან ლაშა თაბუკაშვილთან ერთად გაიარა იგივე გზა. მას შემდეგ ყოველ წელს ემატებოდნენ ბიჭები და 12 მაისს ანდრია მოციქულის ნაკვალევს ტრადიციულად მოილოცავდნენ.  2016 წლიდან კი, ახალგაზრდების ძალისხმევითა და ინიციატივით მსვლელობას ექსტრემალური პილიგრიმული ტურის სახე მიეცა და უკვე მეოთხე წელია, ხარაგაულში, 12 მაისს განსაკუთრებული სიხარულით ელოდებიან.  პილიგრიმული ტური ყოველ წელს უფრო მეტ მასშტაბებს იძენს და მასში მომლოცველები საქართველოს სხვადასხვა კუთხიდან ერთვებიან.  წელს ანდრიაობას ამერიკის მისიის ხელმძღვანელი სქართველოში, ელიზაბეთ რუდიც შეუერთდა, რომელმაც მთა რკინის ჯვარი ტურის ახალგაზრდა ორგანიზატორებთან ერთად მოილოცა. მსვლელობაში უკვე მეოთხე წელია ტრადიციულად მონაწილეობენ საქართველოს Of Road - ის ფედერაციის წარმომადგენლები.  ტურის ფარგლებში, პილიგრიმებს ეკო ტურიზმის ასოციაცია ხარაგაულის ნობათით გაუმასპინძლდა. ასოციაცია, ამ ეტაპზე, ბორჯომ-ხარაგაულის ეროვნული პარკის მიმდებარე სოფლებში ეკო ტურიზმის განვითარებისთვის პროექტს ახორციელებს. პროექტი ხარაგაულელი ახალგაზრდების ინიციატივით, ელიზაბეთ რუდის მხარდაჭერით და usaid -ის დაფინანსებით ხორციელდება.  ბორჯომ-ხარაგაულის ეროვნული პარკში მდებარე მთა რკინის ჯვრისკენ პილიგრიმები ურთულესი გზა გადიან და წმიდა ანდრია პირველწოდებულის სახელობის მირონმდინარი ხატს ზღვის დონიდან 2 439 მეტრზე, ანდრია მოციქულის ნაკვალევზე მიაბრძანებენ. გადმოცემის თანახმად, პირველ საუკუნეში, საქართველოში მოგზაურობის დროს, სწორედ ამ მთაზე აღმართა ანდრია პირველწოდებულმა რკინის ჯვარი. წელიწადში ერთხელ, ანდრიაობის დღესასწაულთან დაკავშირებით, მირონმდინარი ხატი, უწმინდესისა და უნეტარესის სრულიად საქართველოს კათოლიკოს-პატრიარქის, ილია მეორის ლოცვა-კურთხევით, სიონის საკათედრო ტაძარს ტოვებს და ანდრია მოციქულის განვლილ გზას მიუყვება.  პილიგრიმული ტურის მხარდამჭერია ხარაგაულის მუნიციპალიტეტის მერია, საქართველოს თავდაცვის სამინისტრო და საქართველოს საპატრიარქო.

სამუშაო თათბირი გაიმართა ხარაგაულის მერიაში, სადაც მუნიციპალიტეტის მერმა, ნიკოლოზ თოფურიძემ კონტროლის ჯგუფის წევრებს, რომლის თავმჯდომარეც, ამ დრომდე, მერის პირველი მოადგილე, არჩილ მაღღაძე გახლდათ, ფუნქციები გადაუნაწილა. ხარაგაულის მუნიციპალიტეტის მერის პირველმა მოადგილემ, არჩილ მაღრაძემ თანამდებობა 8 მაისს, პირადი განცხადების საფუძველზე, დატოვა. არჩილ მაღრაძე პირველი მოადგილის პოსტს 2016 წლის ნოემბრიდან იკავებდა და ის მერიაში ინფრასტრუქტურულ მიმართულებას კურირებდა.